Mensur Krasniqi
Në takimin e fundit me përfaqësuesit e katër partive nënshkruese të Marrëveshjes së Përzhinos, ndërmjetësuesi i KE-së Piter van Hojte, duke i befasuar të gjithë, takimin e ka filluar me një fjalim të shkurtër emocional.
OJQ Civil, përfaqësuesit e së cilës kanë qenë në atë takim, e ndajnë me opinionin këtë fjalim të Hojtes.
“Politikanë, përfaqësues të mediumeve, anëtarë të shoqërisë civile, ju jeni zemra e demokracisë. Ju jeni mbajtës të përgjegjësisë për atë, ta ndërtoni demokracinë e vërtetë. Demokracinë, në të cilën qytetarët mes vete do të respektohen, aty ku është e lejuar që të ketë mendime të ndryshme.
Sot, kur të gjithë do të ktheheni në shtëpi, të gjithë ju, do të duhej të jeni në gjendje t’i përqafoni të dashurit tuaj, t’i shihni në sy fëmijët dhe nipërit tuaj dhe t’u thoni: “Sot, e kam ndjekur ndërgjegjen time, nuk u jam nënshtruar trysnive, nuk pranova asnjë ryshfet, ndihmova që të ndërtohet ardhmëria juaj, ardhmëria në të cilën nuk është patjetër që ta lëshoni vendin për ta gjetur një pune më të mirë, ardhmëria në të cilën njerëzit respektohen mes vete, vend në të cilin njerëzit bisedojnë dhe dëgjohen mes vete, pa marrë parasysh nivelet e tyre, më shkurt, vend i cili do t’i ndjekë vlerat evropiane”, ka thënë Hojte. /tesheshi.com/
