Veterani i garave me motorë, italiani Valentino Rossi, është kthyer fuqishëm në luftën për titull në Moto GP, duke e kaluar i pari sot finishin në garën e Katalunjës.
E shtata garë sezonale ka ofruar spektakël në pistë, teksa gjashtë xhirot e fundit kanë qenë një betejë e ashpër mes Rossi-t dhe Marc Marquez-it, në fund të të cilave ka triumfuar motori me numër 46.
Fillimisht do ta kryesonte garën Lorenzo, kampioni i botës në fuqi, për të mbetur pas më tutje xhiro pas xhiroje. Kryesimin do ta merrte Rossi me Jamahën e tij, i shqetësuar vetëm nga Honda e Marquez-it.
Iannone bën një gabim trashanik, duke frenuar vonë dhe duke u përplasur me motorin e Lorenzo-s. Të dy e gjejnë veten jashtë gare, të rrëzuar, por spanjolli shfaqet i tërbuar, pasi mbyll një garë pa asnjë pikë, e veç kësaj, e dorëzon dhe vendin e parë në renditjen e përgjithshme.
Gara do të mbyllej me Rossi-n në vendin e parë, e me dy pilotët e Hondës në vend të dytë e të tretë, Marquez-in dhe Pedrosa-n.
Në fund vjen dhe një shtrëngim duarsh mes dy armiqve të betuar, Rossi-t dhe Marquez-it, që prej muajsh nuk e shihnin as në sy njëri-tjetrin.
Në podium nuk ka festime si çdo herë, teksa nderohet kujtimi i pilotit që humbi jetën dy ditë më parë, Luis Salom.
Marc Marquez ngjitet në vend të parë në renditjen e Moto GP-së, me 125 pikë, dhjetë më shumë se spanjolli tjetër, Lorenzo, që detyrohet të zbresë në vend të dytë. Rossi, në kërkim të një titulli të dhjetë, pozicionohet i treti, me 103 pikë. /tesheshi.com/
