Tetë shtete anëtare të BE-së kanë mbyllur kufij për shtetasit e huaj për shkak të pandemisë së koronavirusit, por disa ekspertë besojnë se nuk do të ndihmojë në ndalimin e përhapjes së sëmundjes.
Kufijtë për të gjithë shtetasit e huaj u mbyllën nga Hungaria, Republika Çeke, Qipro, Danimarka, Lituania, Letonia, Polonia dhe Sllovakia.
Austria dhe disa vende të tjera kanë mbyllur pjesërisht kufijtë dhe kanë futur kontrolle shtesë kufitare.
Gjermania u bashkua me këtë grup të hënën, duke mbyllur pjesërisht me kufirin me Austrinë, Danimarkën, Francën, Luksemburgun dhe Zvicrën.
Të përjashtuar nga ndalimi i lëvizjes janë njerëzit që duhet të kalojnë kufirin për shkak të largimit të tyre në punë, njoftoi agjensia e lajmeve dpa.
Sllovenia mbylli kufirin me Italinë dhe pjesërisht mbylli kufirin midis Italisë dhe Zvicrës.
Në nivel global, Shtetet e Bashkuara ndaluan hyrjet nga Irlanda dhe Mbretëria e Bashkuar.
Nga ana tjetër, Xhibuti, Gana, Haiti, Kenia, Libia, Maroku, Serbia, Tanzania dhe Tunizia kanë ose kufij plotësisht të mbyllur ose kanë ndaluar fluturimet me BE.
Turqia ka mbyllur kufijtë për udhëtarët nga nëntë vende anëtare të BE-së, ndërsa Rusia ka mbyllur kufirin tokësor me Poloninë dhe Norvegjinë.
Masat e rrepta u futën pasi Organizata Botërore e Shëndetit (OBSH) shpalli Evropën epiqendrën e re të pandemisë.
Presidenti Francez Emmanuel Macron, Kancelarja Gjermane Angela Merkel dhe Presidentja e Komisionit Evropian Ursula von der Leyen, kanë rënë dakord të ndërmarrin veprime në kufijtë e jashtëm të BE.
Macron dënoi masat e njëanshme të kontrollit kufitar të marra nga disa vende të BE në një përpjekje për të kontrolluar përhapjen e virusit.
Kishte një debat midis Macron dhe Merkel pasi Gjermania vendosi të fusë përkohësisht kontrollet kufitare me Austrinë, Zvicrën, Francën, Luksemburgun dhe Danimarkën.
Një zëdhënës i KE tha më herët se çdo masë në kufij duhet të jetë e koordinuar mirë.
Von der Leyen tha se Organizata Botërore e Shëndetit nuk e konsideronte masën “ndalimin e përgjithshëm të udhëtimit” si më të efektshmin.
Ajo paralajmëroi se mbyllja e kufijve do të shkaktojë dëme shtesë “sociale dhe ekonomike”.
“Tregu i vetëm duhet të funksionojë. Nuk është mirë që shtetet anëtare të marrin masa të njëanshme, pasi kjo gjithmonë shkakton një efekt domino, i cili parandalon që pajisjet e nevojshme të arrijnë tek pacientët, spitalet dhe stafi mjekësor”, tha ajo.
Mbyllja e kufijve është kundër parimit evropian të lëvizjes së lirë të njerëzve dhe nuk mbështetet nga disa ekspertë.
Epidemiologu suedez Anders Tegnell, për shembull, mendon se masat daneze janë “plotësisht të kota”, raporton Euobserver.
“Unë nuk e kuptoj se si mund të na ndihmojë. Nuk ka asnjë hulumtim për këtë. Përkundrazi, do të na bëjë dëm ekonomik,” tha ai.
Ministri i shëndetësisë i Gjermanisë, Jens Spahn, tha para se kufiri të ishte mbyllur pjesërisht, se “virusi është në Gjermani, virusi është në Evropë. Ne duhet të mësohemi me këtë.”
“Do të vazhdojë të përhapet, edhe pse po i mbyllni të gjithë kufijtë. Së shpejti ose më vonë ju duhet të lejoni që njerëzit të futen brenda ose jashtë përsëri dhe virusi do të fillojë sërish të përhapet,” tha ai.
Ministri i Brendshëm suedez Mikael Damberg tha se është po aq i shqetësuar.
“Sistemi i transportit duhet të funksionojë kur bëhet fjalë për ushqimin dhe materialet shëndetësore … në mënyrë që të mos i shkaktojmë njëri-tjetrit probleme në këtë krizë,” tha ai.
Por tetë shtetet anëtare që mbyllën kufijtë nuk duket se mendojnë kështu.
“Lëvizja e lirë në zonën Shengen ishte vlera jonë më e madhe, por tani ajo është bërë rreziku më i madh,” tha Ministrja e Brendshme lituaneze Rita Tamašuniene. /tesheshi.com/
