Kombëtarja franceze nuk do të ketë në përbërjen e vet për Euro 2016-tën Mathieu Valbuena-n, të lënë jashtë listës së 23 lojtarëve.
Një incident mes tij dhe sulmuesit të Realit të Madridit, Karim Benzema, i bërë publik vitin e shkuar dhe ende në proces ndjekjeje nga organet përkatëse, do t’i kushtonte shumë këtij të fundit, që e bëri të ditur mospraninë e tij në Europian një muaj më herët.
Mospërfshirja në listë e 31-vjeçarit, që luan me Lionin në kampionatin francez, ka patur si shpjegim formën jo të mirë fizike të tij. Kjo është ajo çka të paktën pretendon tekniku i kombëtares franceze, Didier Deschamps.
Valbuena ka zgjedhur të reagojë në rrjetet sociale mbrëmë vonë, duke shkruar: “Çfarëdo që të jenë arsyet, sportive apo josportive, të përligjura apo jo, mospërzgjedhja ime është një zhgënjim i madh.”
Ish-lojtari i Olimpikut të Marsejës ka debutuar me përfaqësuesen franceze në maj të 2010-tës, duke zhvilluar 52 takime e duke shënuar tetë gola.
Kontributi i tij i gjatë te kjo kombëtare është ajo çfarë e ka pezmatuar lojtarin.
Ja si e arsyeton ai zhgënjimin: “Për shkak të përfshirjes time në ekipin kombëtar francez për shumë vite, por gjithashtu për shkak të dashurisë për vendin tim dhe për bluzën e Francës.”
Ndërsa i uron sukses përfaqësueses franceze në Euro 2016, Valbuena premton se do të flasë më vonë për gjithçka. “Nga respekti për shokët e skuadrës dhe për tërë ekipin e Francës, kam për të folur më vonë mbi sezonin dhe mbi faktet që mund të kenë lidhje me mua.”
Përfaqësuesja e Francës gjendet në të njëjtin grup me kombëtaren shqiptare, dhe ballafaqimin mes tyre do ta kenë më 15 qershor, në “Velodrome” të Marsejës. /tesheshi.com/
