Një javë pasi presidenti Thaci tha se institucionet nuk do të lejojnë askënd të vë veto pafund për ushtrinë, duke aluduar në Listën Serbe e cila nuk po jep votat në Kuvend për të bërë ndryshimet e nevojshme kushteteuse, një mesazh të tillë e ka përcjellë edhe Ndihmës/Sekretari i Shtetit për Çështje Evropiane dhe Evroaziatike, Wess Mitchell, i cili ka deklaruar se askush s’mund të vë veto ndaj transformimit të ushtrisë.
Zyrtari i lartë amerikan tha se janë diskutuar edhe ndryshimet kushtetuese, sipas të cilave mendohet të bëhet transformimi i Forcave të Sigurisë së Kosovës në ushtri.
“Folëm për ndryshimet kushtetuese dhe e theksova para Presidentit se askush nuk ka të drejtë të vë veto mbi sigurinë e Kosovës”, tha Mitchell, pas një takimi që zhvilloi të hënën me Thaçi në Prishtinë.
I pyetur nëse kjo ka të bëjë me Listën Serbe, Mitchel ka qenë direkt duke përmendur Beogradin.
“SHBA ka qenë mbështetëse shumë e ngushtë e transformimit të FSK’së dhe ne do ta vazhdojmë ta mbështesim këtë transformim në të gjitha nivelet. Mendoj se miqtë tanë në Beograd janë shumë të njoftuar me pozicionin e Amerikës dhe do ta përsëris këtë edhe në Beograd”, deklaroi Mitchel.
Ai po ashtu ka mohuar raportimet e mediave serbe se ai ka ardhur me një plan për Kosovën të cilën do t’ia shpaloste presidentit serb Aleksander Vucic, ndërsa ka treguar se po qëndron në Prishtinë për një plan të përbashkët të së ardhmes së Kosovës dhe Serbisë në BE. /tesheshi.com/
