Ministria holandeze e Mbrojtjes po përpiqet urgjentisht të rekrutojë dhjetëra mjekë dhe infermierë për t’iu bashkuar Forcave të Armatosura të vendit, si ushtarë profesionistë apo rezervistë.
Sipas NL Times, kolonele-pilotes Saskia Meerhoff tha se Ministria po përgatitet për një luftë të mundshme në territorin e Aleancës së Atlantikut të Veriut (NATO) dhe se këta punonjës mjekësorë janë të nevojshëm për t’u kujdesur për ushtarët e plagosur që do të transportoheshin në Holandë nga misionet jashtë vendit.
Sipas saj, ushtria holandeze tashmë po kryen një rekrutim të tillë në 14 spitale të mëdha. Meerhoff tha se ushtria holandeze ka nevojë për të paktën 12 mjekë “intensivistë” – ata që do të punonin në njësitë e kujdesit intensiv – dhe “dhjetëra” infermierë shtesë.
Stërvitja dhe programi deri në vitin 2028
“Ne duhet të zgjerojmë kapacitetin tonë me personel mjekësor që mund të shoqërojë të plagosurit rëndë nga (pika) A në (pika) B. Holanda duhet të jetë në gjendje të transferojë të plagosurit përsëri në një spital në vendin tonë,” theksoi ajo.
Në misionet jashtë vendit, Holanda tashmë ka ekipe kirurgjikale të përbëra nga kirurgë, anesteziologë dhe infermierë, të cilët bashkohen me ushtarët holandezë, por deri më tani ajo është mbështetur gjithmonë në vende të tjera, si Gjermania apo Mbretëria e Bashkuar, për të transportuar ushtarë të plagosur.
“Tani duhet ta bëjmë vetë”, tha Meerhoff, duke shtuar se ekipet e reja të kujdesit intensiv duhet të trajnohen dhe vendosen deri në vitin 2028. /tesheshi.com/
