Autoritetet financiare të Xhamajkës kanë nisur një hetim ndaj kompanisë që mban investimet e fituesit të tetë herë medaljes së artë olimpike, Usain Bolt, pas raportimeve se ai mund të ketë humbur miliona në një mashtrim të madh.
Stocks & Securities Ltd, një kompani private e menaxhimit të aseteve me bazë në kryeqytetin Kingston, është vendosur nën “mbikëqyrje të zgjeruar” ndërsa Komisioni i Shërbimeve Financiare (FSC) heton.
Menaxheri i Bolt, Nugent Walker, i tha gazetës The Gleaner se sprinteri në pension ka pasur investime në kompani për më shumë se një dekadë.
Gazetat shkruajnë se miliona dollarë janë zhdukur nga llogaria e Bolt.
“Të gjithë hapat përkatës janë marrë për të arritur tek e vërteta,” tha Walker për gazetën, duke theksuar se atleti vuri re mospërputhje në llogarinë e tij të mërkurën. “Ai ka qenë me këtë kompani për mbi 10 vjet […] Gjithë portofoli i tij është duke u rishikuar”.
FSC thotë se është “në dijeni të raporteve të pretendimeve për mashtrim në një nga kompanitë e saj të licencuara, Stocks and Securities Limited (SSL)”.
Mbajtësi i rekordeve botërore
Bolt u tërhoq nga atletika në vitin 2017 pas një karriere në të cilën, përveç tetë medaljeve të arta olimpike, ai fitoi 11 tituj të kampionatit botëror.
Ai fitoi famë botërore në Lojërat Olimpike të Pekinit 2008 kur fitoi vrapimet 100 dhe 200 metra, duke vendosur rekorde të reja botërore në të dyja garat.
Xhamajkani më pas fitoi të dyja garat dhe në Lojërat Londër 2012, por edhe katër vjet më vonë në Rio de Zhaneiro.
Koha e Bolt në 100 metra prej 9,57 sekonda, e vendosur në Berlin në 2009, mbetet rekordi botëror dhe ai gjithashtu mban kohën më të shpejtë në 200 metra (19,19 sekonda).
Ai bëri paraqitjen e tij të parë si futbollist profesionist në një miqësore para-sezonale në Australi në vitin 2018, duke luajtur për klubin australian A-League Central Coast Mariners. /tesheshi.com/
