Vendi afrikan është prekur nga thatësira, një katastrofë kombëtare. E bashkë me të, uria dhe sëmundjet e shpërthyera u kanë marrë jetën 110 personave në dy ditë në një rajon të vetëm të Somalisë.
Hassan Ali Khaire, kryeministri i Somalisë, e lajmëroi bilancin e viktimave përmes një deklarate të zyrës së tij.
Thatësira ka çuar në shpërthim të kolerës, të fruthit e të diarresë, ndërsa i goditur më së shumti është një rajon në jugperëndim të vendit të varfër.
Vetëm nga kolera kanë humbur jetën 69 persona që nga e premtja, e 70 të tjerë janë dërguar në spital.
Qeveria kërkoi ndihmën e të gjithë qytetarëve për atë që po ndodhte: “Qeveria somaleze do të bëjë më të mirën, dhe i nxisim të gjithë somalezët, kudo ku janë, t’i ndihmojnë dhe t’i shpëtojnë bashkëqytetarët që po vdesin.”
Mijëra vetë kanë vërshuar drejt kryeqytetit të vendit, në kërkimin për ushqim, ndërkohë që OKB-ja çmon se pesë milionë njerëz në tërë Somalinë kanë nevojë për ndihmë, të rrezikuar nga një uri e përgjithshme. /tesheshi.com/
