Imazhet nga Rafah të dielën mbrëma janë një tjetër provë se Gaza është “ferr në tokë”, njoftoi Agjencia e Kombeve të Bashkuara për Refugjatët Palestinë (UNRWA).
Të paktën 40 persona u vranë dhe dhjetëra u plagosën nga bombardimet izraelite të shtëpive dhe kampit ku po qëndrojnë të zhvendosurit në Rafah.
“Informacioni që vjen nga Rafah për sulme të mëtejshme ndaj familjeve që kërkojnë strehim është tmerrues. Ka raportime për viktima masive, duke përfshirë fëmijë dhe gra. Gaza është ferr në tokë. Fotot nga mbrëmja e kaluar janë një tjetër dëshmi për këtë”, deklaroi UNRWA në platformën X.
Majed al-Attar, një person i zhvendosur nga Beit Lahiya në Rripin verior të Gazës, tha se humbi pesë anëtarë të familjes së tij.
“Ne ishim ulur në tenda dhe papritmas kampi u bombardua. Në mesin e personave që vranë kishte dhe gratë shtatzëna. Unë humba pesë anëtarë të familjes sime, të gjithë u dogjën plotësisht. Na kanë thënë çdo herë që kjo zonë është e sigurt derisa të na bombardojnë”, tha ai.
Reagimi nga Prokurori Karim Khan
Prokurori i Gjykatës Penale Ndërkombëtare Karim Khan akuzoi Izraelin për dënim kolektiv të Gazës, duke theksuar se askush nuk ka licencë për të kryer krime lufte apo krime kundër njerëzimit.
Në një deklaratë për gazetën britanike The Sunday Times të dielën, Khan tha: “Në një botë gjithnjë e më të polarizuar, ne duhet të pohojmë se çdo fëmijë, grua dhe civil ka vlerë të barabartë”.
Ai theksoi se do të ketë pasoja të mëdha nëse vendet nuk ndërmarrin hapa në rast të një urdhër-arresti të lëshuar nga Gjykata Penale Ndërkombëtare.
Ai vazhdoi: “Shikoni se çfarë thonë të gjitha organizatat kryesore humanitare. Ne shohim fëmijë të dobët. Edhe nëse nuk u besojmë mjekëve palestinezë, mjekët amerikanë dhe britanikë flasin për amputime pa anestezi, fëmijë që vdesin në inkubatorë për shkak të ndërprerjes së energjisë elektrike dhe njerëz që vdesin nga mungesa e insulinës”.
Izraeli është akuzuar për gjenocid përpara Gjykatës Ndërkombëtare të Drejtësisë (ICJ), e cila në vendimin e saj të fundit urdhëroi Tel Avivin që të përfundojë menjëherë operacionin e tij në Rafah, një qytet në Rripin jugor të Gazës ku më shumë se një milion palestinezë të zhvendosur kanë kërkuar strehim.
Si reagoi koka e masakrave, Netanyahu?
Kryeministri izraelit e quajti vdekjen e dhjetëra civilëve palestinezë në një sulm ajror izraelit në Rafah në jug të Rripit të Gazës një “aksident tragjik”.
Në mënyrën më të poshtër, duke folur në Knesset, parlamenti i Izraelit, Netanyahu tha se viktimat civile ndodhën kur forcat izraelite shënjestruan anëtarët e lëvizjes palestineze Hamas në Rafah.
Sulmi ndodhi të dielën pranë bazës logjistike të Agjencisë së OKB-së për Refugjatët Palestinë (UNRWA) në Tal al-Sultan.
Sulmi tërhoqi dënime të ashpra nga e gjithë bota mes akuzave në rritje se Izraeli po kundërshton thirrjet për t’i dhënë fund ofensivës së tij vdekjeprurëse në Rripin e Gazës. /tesheshi.com/
