Një nga mediat shqiptare ka dhënë lajmin e palajm se kreu i Partisë Republikane, Fatmir Mediu, ka zhvilluar një vizitë në SHBA ku është takuar me kongresmenë të ndryshëm në Kongresin Amerikan.
Është vetë Mediu që thotë se diskutoi me kongresmenët në SHBA, ndërhyrjen dhe rolin e Kinës dhe Rusisë në rajon, si dhe situatën në Kosovë, ku kërkoi ndërhyrja më aktive të SHBA në normalizimin e marrëdhënieve mes Serbisë dhe Kosovës.
“Kërcënimi i parë për rajonin e Ballkanit është korrupsioni dhe krimi i organizuar. Mosfunksionimi i ligjit dhe institucioneve demokratike, mungesa e zgjedhjeve të lira dhe të ndershme.
Rrikthimi tek ndarjet dhe retorikat nacionaliste, konflikteve të vjetra për qëllime pushteti. Mungesa e reformave dhe zhvillimit ekonomik të cilat kanë krijuar terren për ndërhyrje të aktorëve të tretë si Kina dhe Rusia.
Situata në Kosovë dhe nevoja për ndërhyrje më aktive nga SHBA në dialogun ndërmjet Kosovës dhe Serbisë me qëllim final njohjen reciproke të dy shteteve.
Nevoja për një bashkëpunim të fortë të SHBA me vendet e NATOs në Ballkan me qëllim parandalimin e çdo konflikti të mundshëm”, shkruan njeriu që në fakt, nisur nga fakti që forca që ai drejton është e profilizuar te prona që në krijim të saj, prej themeluesit, të ndjerit Sabri Godo, duhej të fliste apo angazhohej vetëm më këtë çështje kauzale e jo aspekte gjeopolitike.
E megjithatë, Mediu ka vite që e ka kthyer në rit takimin me kongresmenë amerikane, gjë e cila nuk i shton as faktorizim e as ndonjë peshë në politikën shqiptare. Ndaj dhe nuk përbën lajm. /tesheshi.com/
