Ukraina ka rifituar kontrollin e një fshati pranë qytetit të Lysichansk-ut, në një fitore të vogël por simbolike që do të thotë se Rusia nuk ka më kontroll të plotë të rajonit të Luhanskut, një nga ata që Putini e ka caktuar si objektiv lufte.
Guvernatori i rajonit të Luhanskut, Sergej Hajday, konfirmoi se forcat ukrainase kanë vendosur kontroll të plotë mbi Bilogorivka-n.
“Bëhet fjalë për rrethinën e Lysichansk-ut. Së shpejti do ta fshijmë edhe atë llum nga atje. Hap pas hapi, centimetër pas centimetri, do ta çlirojmë të gjithë vendin tonë nga agresorët”, tha Hajday.
Wagner Group, një kompani ushtarake private ruse, po përpiqet të rekrutojë më shumë se 1500 kriminelë të dënuar për t’iu bashkuar luftës së Rusisë në Ukrainë, por shumë prej tyre po refuzojnë të bashkohen, tha të hënën një zyrtar i lartë i mbrojtjes amerikane.
“Informacionet tona tregojnë se Wagner po vuan humbje të mëdha në Ukrainë, veçanërisht – jo çuditërisht – midis luftëtarëve të rinj dhe të papërvojë,” u tha gazetarëve një zyrtar amerikan, duke folur në kushte anonimiteti.
Bashkimi Evropian vendosi sanksione ndaj Grupit Wagner, duke e akuzuar atë për operacione të fshehta në emër të Kremlinit.
Presidenti rus Vladimir Putin tha se grupi nuk përfaqëson shtetin rus, por se kontraktorët privatë ushtarakë kanë të drejtë të punojnë kudo në botë për sa kohë që nuk shkelin ligjin rus.
Luftëtarët e Grupit Wagner janë akuzuar nga grupet e të drejtave të njeriut dhe qeveria ukrainase për kryerjen e krimeve të luftës në Siri dhe Ukrainën lindore që nga viti 2014 e tutje.
Në korrik, inteligjenca ushtarake britanike tha se Rusia po përdorte grupin Wagner për të forcuar forcat e saj të vijës së parë në konfliktin në Ukrainë.
Rusia ka pësuar midis 70,000 dhe 80,000 viktima, ose të vrarë ose të plagosur, që nga fillimi i pushtimit të Ukrainës, tha Pentagoni muajin e kaluar. /tesheshi.com/
