“Në foto është babai im që u vra brutalisht nga fashistët rusë në Irpin. Më 25 mars, në orën 18, ata hynë në shtëpinë tonë dhe hodhën një granatë…”
Me këto fjalë, Karina Vasilenko i dha lamtumirën babait të saj, Sergeit, një prej viktimave të shumta të agresionit rus të Ukrainës.
“Babi, nuk ka më njerëz si ti. Unë nuk njoh njeri më të sjellshëm se ti. Gjithmonë ke qenë një mbështetje për të gjithë. Gjithmonë i ke ndihmuar të gjithë … të gjithë të kanë dashur, absolutisht të gjithë … ti ishin një shpirt i mrekullueshëm i një njeriu.
Nën granatime shkove të ushqesh pulat e komshiut, nën granatime shkove të ushqesh macet dhe qentë e rrugës, edhe pse vetë kishe shumë pak ushqim. Gjatë kohës që ju granatonin, kërkoje ilaçe për pensionistët që kanë mbetur vetëm.
Deri ditën e fundit, u kujdes për 13 mace që i shpëtove nga rruga dhe nuk mund t’i lije vetëm. Nuk mund të largoheshe pa to. Gjithmonë ke menduar fillimisht për ta dhe më pas për veten”, shkruan Vasilenko, duke shtuar:
“Dhe tani je i shtrirë i vetëm, i rrethuar nga miqtë e tu me katër këmbë që nuk të lënë, as nuk mund të të marrim e të të varrosim, është ferr.
Fjalët nuk mund ta përshkruajnë dhimbjen që përjetojmë unë dhe nëna ime. Ne vdiqëm me ty! Nuk e di se si t’i mbijetoj kësaj dhe sa më shumë duhet të qajmë dhe të bërtasim për të lehtësuar të paktën një për qind të kësaj dhimbjeje. Nuk di si të jetoj më, babi!
Jeta ime ndaloi më 25 mars 2022. Rusia e ndyrë na mori gjithçka…”
Pas njoftimit të saj, shumë përdorues të rrjeteve sociale nisën një aksion në përpjekje për të shpëtuar të paktën macet që, siç zbuloi ajo, ende nuk ndahen nga babai i saj. /tesheshi.com/
