Rusia njoftoi të hënën se kishte rrëzuar nëntë dronë ukrainas për të cilët tha se po përpiqeshin të sulmonin një pjesë të infrastrukturës së tubacionit të gazit Rrjedha Turke përmes të cilit Rusia dërgon gaz në Turqi dhe më pas në Evropë.
Ministria ruse e Mbrojtjes njoftoi se sulmi kishte në shënjestër një stacion kompresori në rajonin Krasnodar në jug të Rusisë, por se stacioni tani po funksionon normalisht dhe nuk ka viktima, raporton Reuters.
Reuters tha se nuk mund ta konfirmonte në mënyrë të pavarur lajmin dhe Ukraina nuk ka komentuar ende.
Rrugët e fundit të gazit rus në Evropë
Rrjedha Turke dhe Rrjedha Blu, të cilat kalojnë përmes Detit të Zi në Turqi, janë rrugët e fundit ruse për dërgimin e gazit me tubacion në Evropë, pasi Ukraina refuzoi të rinovojë një kontratë pesëvjeçare për të transituar gazin rus përmes territorit të saj në fillim të këtij viti.
Deklarata ruse tha se fragmente të dronëve të rrëzuar shkaktuan dëme të vogla në ndërtesën dhe pajisjet e stacionit matës, të cilat u riparuan shpejt.
Tubacioni i gazit fillon në një stacion kompresori pranë qytetit rus të Anapa dhe të çon në Kıyıkoy në Turqi dhe më pas në Evropë.
Stacionet e kompresorëve përdoren për të stabilizuar presionin e gazit dhe nivelet e rrjedhës. /tesheshi.com/
