Në fund të këtij viti, pritet të lëshohet në pun ujësjellësi i ri i komunës së Zubin Potokut, apo si e quajnë serbët e veriut, Ujësjellësi rajonal, atë që përfshin tri komunat: Zubin Potok, Zveçan e Mitrovicë të veriut.
Me këtë projekt, sipas zyrtarëve të qeverisë së Serbisë, pritet që mbi 50.000 banorë të këtyre komunave me fshatra përrreth të kenë ujin në çezmat e tyre.
Projekti ka kushtuar rreth 11 milion euro. Në fillim është financuar tërësisht nga qeveria izraelite, pra në vitin 2008, ndërsa në vitin 2013 kur ka filluar edhe realizimi, projekti është financuar nga qeveria e Serbisë; ndërsa që paratë izraelite që ishin donacion, thuhet se avulluar në zyrat e Beogradit.
Por realizimi i këtij projekti që është tërësisht antikombëtar, tha një burim nga veriu i Mitrovicës, duke saktësuar se pjesë e kësaj skeme janë institucionet e Kosovës, duke filluar që nga Ujësjellësi rajonal i Mitrovicës, qeveria e Kosovës dhe bashkësia ndërkombëtare.
Sipas tij, ndalja e ujit në ditët më të nxehta të verës nga ana e Ujësjellësit rajonal të Mitrovicës (që përfshinë 4 komunat Mitrovicë, Vushtrri, Skënderaj dhe Zveçan) për pjesën veriore të Mitrovicës dhe Komunën e Zveçanin, që ishin të banuar me popullatë shumicë serbe, ka bërë që bashkësia ndërkombëtare të përkrahë një projekt të tillë.
Burimi ka shtuar se ndërkohë që ish-kryeministri Hashim Thaçi, gjatë viti 2013 ishte në Bruksel për bisedime me qeverinë e Serbisë, uji i është ndalur veriut të Mitrovicës dhe Zveçanit. Serbët kanë ndërhyrë në Bruksel direkt tek pala serbe që ishte në bisedime dhe çështja e ujit është aktualizuar.
Në këtë rast, një këshilltar i kryeministrit Thaçi, është detyruar që të telefonojnë në Mitrovicë dhe të urdhërojë lëshimin e ujit për veriun e Mitrovicës dhe Zveçanit.
“Këto budallallëqet tonat i kanë shfrytëzuar serbët duke bindur bashkësinë ndërkombëtare që të lejojë ndërtimin e këtij ujësjellësi, pasi shqiptarët nuk janë bashkëpunues”, ka thënë burimi.
Sipas tij, bashkësia ndërkombëtare gjatë vitit 2008-2012 ka qenë kundër këtij projekti pasi në jug të Mitrovicës kishte filluar ndërtimi i fabrikës së re të ujit me kapacitet 600l/s, donacion i BE-së. BE-ja, qëllimisht ia kishte dhënë për ndërtim fabrikën e re një kompanie nga Beogradi, “Lad-Group”, duke bindur serbët që të heqin dorë nga projekti i tyre, ndërsa që rajoni furnizohej nga fabrika e vjetër që kishte një kapacitet prej 400l/s.
“Në anën tjetër, qeveria e Kosovës në fillim e ka neglizhuar këtë problem, por kur projekti ka kaluar në fazën përfundimtare, atëherë është ndjerë e pafuqishme që të ndërmarrë diçka, vetëm se ai ka bërë aminin kësaj pune”, ka thënë burimi i portalit tesheshi.com.
Burimi nga jugu i Mitrovicës ka shtuar se qeveria e Kosovës dhe institucionet lokale, duke ditur konfiguracionin e terenit që është shumë malor, kanë menduar në fillim se një projekt i tillë është i parealizueshëm, pasi vija e ujësjellësit duhet të kalonte nëpër luginë e Ibrit, pra nëpër toka shqiptare, nga fshati Çabër e deri në Mitrovicë.
Por qeveria e Serbisë, së bashku me katër ish-kryetarët e komunave të veriut, që ishin edhe të përzgjedhurit e qeverisë në Prishtinë, angazhuan Institutin “CIP” nga Beogradi që të bëjë projektin duke ju ikur tokave shqiptare në mënyrë që vija e ujësjellësit të kalojë vetëm nëpër toka të qytetarëve serbë ose komunale, gjë që ia rriti kostot financiare.
Më shumë, kostoja u rrit nga hapja e një tuneli në fshatin Jegenic i komunës së Zubin Potokut, e deri në afërsi të fshatit Banjske të komunës së Zveçanit, pra rreth 1 km i gjatë, saktësisht 970 m.
Më 20 gusht 2015, gjatë ndërtimit të tij nga kompania serbe, dy minatorë kanë humbur jetën si pasojë e mosplotësimit të kritereve të punës, rast është hap nga policia e Kosovës, por shumë shpejt edhe është mbyllur duke mos i ditur arsyet .
Ideja për ndërtimin e këtij ujësjellësi vetëm për serbët e veriut të Kosovës, ka rrjedhur në vitin 2008 nga ministri i atëhershëm i Bujqësisë në qeverinë e Serbisë të Voisllav Koshtunicës, Velimir Iliq, ndërsa që është realizuar në vitin 2013 nga Aleksandar Vulin, ministër për Kosovën në Qeverinë e Ivica Daqiqit. /tesheshi.com/
