“Boleyn Ground”, apo i njohur ndryshe dhe si “Upton Park”, i ka mbyllur mbrëmë dyert pas 112 vitesh. Në këtë stadium të Londrës do të luhej për herë të parë në vitin 1904, e për herë të fundit do të zhvillohej mbrëmë një ndeshje.
Ekipi i Mançester Junajtedit do të vinte vonë në shtëpinë e Uest Hemit, me ç’rast do të kishte dhe një
shtyrje të nisjes së ndeshjes. Veç kësaj, autobusi i miqve do të goditej nga tifozët vendas, duke krijuar rrëmujë e probleme jashtë stadiumit.
Mançester Junajtedi kishte një rast të mirë për të siguruar një vend të katërt në Premier League, çka nënkupton pjesëmarrjen në Champions League në sezonin e ardhshëm. Por ashtu si në tërë këtë sezon, “djajtë e kuq” kanë zhgënjyer sërish, duke bërë një ndeshje me pak gjallëri.
Uest Hemi ka luajtur ashtu siç e ka merituar lamtumira e “Upton Park”-ut. Në prani të rreth 35.000 tifozëve, lojtarët e kroatit Slaven Bilic kanë dhënë më të mirën e tyre, duke fituar me përmbysje.
Të zotët e shtëpisë e kanë marrë kryesimin që në minutën e dhjetë, pas golit të Sakho-s. Ata kanë patur një epërsi të padiskutueshme në pjesën e parë. Ka qenë i riu Anthony Martial i Mançesterit, që ashtu si në shumë takime të tjera, e ka nxjerrë ekipin e tij nga balta. Në 45 minutat e dyta, Man. Junajtedi e sheh veten në avantazh falë dy golave të talentit 20-vjeçar.
Dy herë brenda katër minutave do të shënonin vendasit, duke e përmbysur rezultatin dhe duke fituar 3-2. Në minutën e 76-të ka barazuar Antonio, e në të 80-tën Reid i ka dhënë fitoren Uest Hemit.
Skuadra londineze luan tani për një vend të pestë, dhe në ndeshjen e fundit të kampionatit, këtë të dielë, do të përballet me Stouk Sitin në transfertë.
Që nga sezoni i ardhshëm, Uest Hemi do të luajë në “Olympic Stadium”, pasi legjendari “Upton Park” nuk do të jetë më.
Mançester Junajtedi e kishte të sigurt vendin e katërt nëse i fitonte dy ndeshjet e fundit. Por humbja e mbrëmshme thuajse ia bën të pamundur atë. Rivalët e Mançester Sitit gjenden dy pikë para, e mjaftojnë ta fitojnë ndeshjen mbyllëse të kampionatit, që e kanë ndaj Suonsi Sitit në transfertë, për ta garantuar këtë vend të katërt. /tesheshi.com/
