Ajetullah Ali Hamenei e ashpërsoi gjuhën përpara rinisjes së negociatave këtë javë, duke deklaruar dje se SHBA-të kanë krijuar një “mit” të armëve bërthamore për ta portretizuar Iranin si kërcënim.
Hamenei ka dhënë mbështetjen e tij për bisedimet, por nuk e ka fshehur mosbesimin ndaj SHBA-ve.
“Ata krijuan mitin e armëve bërthamore, kështu që mund të thonë se republika islamike është një burim kërcënimi,” janë fjalët e Hameneit të cituara nga agjencia e lajmeve FARS.
“Pala tjetër po na kërcënon ushtarakisht në mënyrë metodike dhe të paturpshme. Edhe nëse ata nuk i bënë këto kërcënime hapur, ne duhet të përgatitemi,” tha ai duke iu drejtuar ushtarakëve iranianë.
Irani dhe gjashtë fuqitë botërore, përfshirë Shtetet e Bashkuara të Amerikës, arritën një marrëveshje kornizë këtë muaj në lidhje me programin bërthamor iranian, dhe negociatat pritet të rifillojnë këtë javë në Vjenë, duke synuar një ujdi përfundimtare në fund të qershorit.
Pavarësisht përparimit të dukshëm, ka ende mospajtime mes palëve, mes të cilëve është dhe koha e heqjes së sanksioneve ndërkombëtare ndaj Iranit.
Vendet perëndimore kanë pretenduar prej kohësh se aktivitetet në fushën bërthamore të Iranit kanë si synim prodhimin e një arme të tillë, por pala e akuzuar ka këmbëngulur ngaherë se qëllimet e përpjekjeve të saj në këtë lëmë janë paqësore. /tesheshi.com/
