Themeluesi i PEGIDA-s, Lutz Bachmann, është dënuar ditën e martë me një gjobë 9.600 euro nga një gjykatë në Dresden të Gjermanisë për ofendim të muslimanëve dhe të huajve përmes disa komenteve në rrjetin social Facebook.
Për Bachmann-in u kërkua nga prokurorët një dënim me burg me shtatë muaj. Ai është akuzuar për nxitje të publikut për dhunë kundër muslimanëve dhe të huajve.
Bachmann ka pretenduar gjatë gjithë procesit gjyqësor se dikush tjetër i kishte postuar komentet në faqen e tij të Facebook-ut. I dënuar më herët për vjedhje, për drogë e për mungesë të dhënies së mbështetjes për fëmijën, nuk është e qartë nëse ai do ta apelojë vendimin.
Lëvizja PEGIDA njihet për kundërshtim të ashpër të politikës liberale të migracionit nga ana e kancelares Angela Merkel. Falë kancelares, vitin e kaluar kanë kërkuar azil në Gjermani mbi një milion persona.
PEGIDA pati arritur që në tubimet e veta të grumbullojë mijëra njerëz, por interesimi do të binte kur mediat nisën të raportonin mbi deklaratat raciste dhe fotografitë “selfie”, në të cilat Bachmann shfaqej me frizurë dhe mustaqe si të Hitlerit. /tesheshi.com/
