Ayman Odeh, udhëheqësi i Listës së Përbashkët Arabe në Izrael dhe anëtar i parlamentit izraelit, ka deklaruar të hënën se Shin Bet-i, agjencia izraelite e sigurisë, është përgjegjëse për vdekjen e themeluesit të OÇP-së, Organizatës për Çlirimin e Palestinës, Jaser Arafatit, në vitin 2004.
Ai e ka akuzuar qeverinë izraelite për vrasjen e udhëheqësit palestinez, njofton e përditshmja Haaretz.
Odeh i ka bërë komentet e tij në një intervistë për kanalin televiziv izraelit Channel 2. Ai ka deklaruar se kur Avi Dichter, tashmë një anëtar parlamenti i partisë Likud, ishte shefi i Shin Bet-it, kishte dërguar njerëz që e vranë Arafatin.
Ayman Odeh nuk e ka lënë me kaq. I pyetur mbi zërat se anëtarët e Listës së Përbashkët Arabe e mbështesin terrorizmin, ai është përgjigjur: “Njerëzit të cilët i vranë arabët me duart e tyre janë ulur në Knesset.”
Në fund të intervistës është kërkuar të dihet nëse dëshironte t’i tërhiqte pretendimet, për çka Odeh ka
thënë: “Ata dërguan njerëz për ta vrarë udhëheqjen e popullit palestinez… Merrni Dichter-in, për shembull. Ai dërgoi njerëz që vranë Jaser Arafatin, Shejh Ahmed Jasinin dhe Abdulaziz er-Rantisin.”
Një gjykatë franceze mbylli në shtatorin e shkuar një çështje gjyqësore të kërkuar nga e veja e udhëheqësit të OÇP-së, që e akuzonte Izraelin për helmim të Arafatit. “Një mungesë e provave të mjaftueshme për ta vazhduar hetimin,” qe arsyetimi i gjykatës për mbylljen e çështjes.
Jaser Arafati vdiq në nëntor të vitit 2004 në një spital pranë Parisit. Në plaçkat e tij do të gjendeshin gjurmë të poloniumit radioaktiv, por ekspertët francezë do të deklaronin se ato ishin me natyrë mjedisore.
Raporti mjekësor pasi Arafati ndërroi jetë do të përcaktonte si shkak një hemorragji në tru prej një infeksioni, por gjithnjë ka qenë i pranishëm dyshimi se ai është vrarë. /tesheshi.com/
