Komisioni i Venecias i ka kthyer përgjigje pyetjeve të opozitës shqiptare në lidhje me vettingun, përgjigje e cila është transmetuar fillimisht nga Zëri i Amerikës. Ka qenë VOA ajo që ka siguruar tekstin e Komisionit të Venecias dhe e ka transmetuar atë ekskluzivisht, duke dhënë në këtë mënyrë edhe zërin e Uashingtonit.
Këtë herë Uashingtoni duket se ka zgjedhur një nga mediat përcjellëse të zërit të tij për të thënë fjalën përfundimtare dhe për ti vënë vulën vettingut, duke mos kaluar konfirmimin dhe komentimin e përgjigjes së Komisionit të Venecias nga ambasadori Donald Lu.
Sipas Zërit të Amerikës, Komisioni i Venecias nuk ka shfaqur asnjë kundërshti lidhur me Ligjin për rivlerësimin e gjyqtarëve dhe prokurorëve dhe sipas tij, dispozitat e ligjit nuk shkelin nenet e Konventës europiane të të Drejtave të Njeriut apo shfaqin problem për asnjë nga çështjet e ngritura nga Gjykata kushtetuese e Shqipërisë në kërkesën e saj për të marrë një opinion rreth tekstit të miratuar nga parlamenti më 30 gusht të këtij viti.
VOA transmeton se kërkesa e Gjykatës Kushtetuese shqiptare drejtuar Venecias përmban një përmbledhje të argumentave të opozitës si dhe katër pyetje specifike, për të cilat është kërkuar dhe mendimi i këtij organizmi./tesheshi.com/
