Presidenti amerikan Donald Trump më në fund ka ndërtuar murin e tij, por jo në kufirin jugor të Shteteve të Bashkuara me Meksikën, siç deshi, por rreth Shtëpisë së Bardhë, për ta mbrojtur atë nga protestuesit, shkruan gazetarja amerikane Karen Tumachel.
Në një artikull në Uashington Post, ajo shkruan se është e vështirë të imagjinohet një metaforë më e përshtatshme për mandatin presidencial të Trump sesa shndërrimi i Shtëpisë së Bardhë në një fortesë.
Ajo vuri në dukje se, përkundër mburrjes së Trump për pushtet dhe sundim, gardhi i ri shumështresor i zi, i cili u vendos përreth Shtëpisë së Bardhë të enjten e kaluar, zbulon se presidenti po vepron nga frika dhe jo nga forca.
Megjithëse protestuesit që mblidhen në rrugë përtej Shtëpisë së Bardhë natën janë kryesisht të qetë, kolumnistja shkruan se Trump ka vendosur një barrierë që e ndan atë nga ajo turmë dhe dhimbjen që ndjen për vrasjen e George Floyd, një amerikan i paarmatosur që vdiq pas një arrestimi policie në Minneapolis.
Tumachel pyet me ironi se cilat janë hapat e ardhshëm të Trump pas gardhit që ai ngriti rreth Shtëpisë së Bardhë?
Si fortesat e qeverive tiranike
Mos ndoshta do të gërmojnë një hendek të mbushur me krokodila dhe gjarpërinjtë, pasi dikur ai sugjeroi të parandalonte që migrantët të kalonin në SHBA-në përtej kufirit gati 2.000 kilometra me Meksikën?
Ajo shkruan se gardhi ishte i ngjashëm me fortifikimet e ndërtuara nga pushtetarët tiranas në vendet e botës së tretë për të mbrojtur veten nga reagimet e njerëzve të zemëruar dhe nuk ngjante me Shtëpinë e Bardhë, e cila është “shtëpia e njerëzve” dhe për shekuj me radhë ka simbolizuar pikërisht këtë.
Autorja e artikullit përfundon duke thënë se një ditë Trump mund të jetë në gjendje të shohë të vërtetën që është bërë e dukshme për të gjithë, se presidenti – i cili duhet të fshihet pas një gardhi dhe një pengese sepse ndjehet i kërcënuar nga qytetarët e tij – është një i burgosur i njerëzve,dhe jo udhëheqësi i tyre.
Rojet e sigurisë së Shtëpisë së Bardhë rritën masat e sigurisë në rrethinat e saj të enjten e kaluar, kur barrierat e betonta dhe një gardh u ngritën rreth hyrjes së parkut përballë rezidencës presidenciale.
Një zëdhënës i shërbimit të sigurimit të presidentit njoftoi mbylljen e disa hyrjeve që çojnë aty, duke theksuar njëherësh se protestuesve u lejohej të zhvillonin demonstrata. /tesheshi.com/
