Gjeneral Piro Ahmetaj ka dhënë dorëheqjen si këshilltar i presidentit Nishani, pas disa përplasjeve me deputetët e komisionit parlamentar të Mbrojtjes të cilët i kishte cilësuar edhe ish-pjesëtarë të sigurimit të shtetit.
Presidenti ka pranuar dorëheqjen e këshilltarit të tij, e sipas kërkesës së botuar nga gazeta “Panorama”, Ahmetaj e ka ndërmarrë një vendim të tillë “duke marrë përgjegjësinë e ngarkesës që ka krijuar për ju dhe për institucionin e presidentit një “pakujdesi teknologji e pafalshme” e postuar në adresën private në FB ditën e diel më 6 shtator 2015, devijimin e qëllimshëm për hakmarrje personale dhe devijimin e orkestruar nga kryetari dhe anëtarët e Komisionit të Sigurisë Kombëtare dhe MM mbi shqetësimet profesionale që trajtohen në këtë status”.
Statusi në fjalë postuar në Facebook, e për të cilin Ahmetaj thotë se është i manipuluar, akuzonte pjesën më të madhe të deputetëve në komisionin e Mbrojtjes si prokurorë, ish-sigurimsa e kryetarë degësh, mes tyre edhe trafikantë e kriminelë.
Ky status u bë shkak i një përplasjeje akoma edhe më të ashpër me kreun e komisionit të Mbrojtjes, Spartak Braho që e akuzoi Ahmetajn si spiun me pseudonimin “Shkodrani”. Ahmetaj paditi Brahon për shpifje.
Në koment të dorëheqjes, Ahmetaj ka deklaruar se ka ndërmarrë një “akt moral”. “Por jam i sigurtë që qasja me këtë rast do të hyjë në memorien e turpit të kthimit të të ligjit famëkeq të agjitacion – propagandas”, tha ai. /tesheshi.com/
