Një kthesë e madhe sa i përket vendimit gjyqësor lidhur me emrin e partisë së Lëvizjes BESA në Maqedoni. Ajo tani nuk i takon ish-kryetarit të kësaj partie, Bilall Kasamit, por lënda rikthehet në shqyrtim të Gjykatës Themelore. Këtë në një konferencë për media e ka bërë të ditur vet Sekretari Gjeneral i Partisë, Skwnder Rexhepi – Zejdi.
Ai ka thënë se ka pasur shumë vërejtje dhe rekomandime të cilat Gjykata Themelore nuk i ka respektuar në vendimin e parë, kështu që pas ankimimit të tyre, Gjykata e Apelit anuloi vendimin e shkallës së parë dhe tani Kasami nuk figuron si kryetar partie, por që së shpejti vulat e partisë do t’i takojnë shumicës absolute në krye me Afrim Gashin.
“Lëvizja BESA është aty ku janë themeluesit dhe anëtarësia e gjerë e saj. Drejtësia po kthehet në vend. Përkundër trumbetimeve llafeve dhe shpifjeve të atyre që falsifikuan edhe emrat personalë të njerëzve, për interesat e ngushta. Ata kanë harruar se ideja e Lëvizjes BESA nuk mund të falsifikohet. Ajo mbetet autentike dhe në atdheun e saj autonom”, ka deklaruar ndër të tjera Rexhepi.
Gjatë konferencës, Rexhepi ka komentuar edhe mbi grupin parlamentar të Lëvizjes BESA, ku sipas tij dy deputetët nga gjithsej 5 që janë, nëse nuk dëshirojnë të jenë pjesë e tyre mund të largohen si të pavarur.
Kujtojmë se dy deputetët Fadil Zendeli dhe Teuta Bilalli deri tani kanë preferuar që të qëndrojnë në grupin e ish kryetarit, Bilall Kasami, por që në kuvend vazhdojnë të funksionojnë si grup parlamentar me kolegët e tyre.
Vendimi i Gjykatës së Apelit që të rikthehet lënda për emrin e partisë së Lëvizjes BESA në Gjykatën Themelore ka shkaktuar reagime tek krahu i Kasamit. Nënkryetari i këtij fraksioni, Abdush Demiri tha se me këtë vendim edhe një herë është dëshmuar se Maqedonia është akoma larg synimit që të jetë shtet i drejtë dhe ligjor. Ai njëkohësisht e ka akuzuar LSDM-në dhe Afrim Gashin se është futur në qeveri vetëm për të ndikuar në vendimin gjyqësor.
“Sot kemi pranuar nga Gjykata e Apelit-Shkup një vendim skandaloz, i cili nuk ka asnjë përmbajtje juridike, që dëshmon se gjyqësia është akoma e kapur nga pushteti dhe vendimet e saj i sjell përmes imponimeve nga partitë në pushtet. Pasi që ne jemi të bindur se jemi në rrugën e drejtë dhe përveç legjitimitetit nga strukturat edhe aspektin legal e kemi të pastër si kristali në favorin tonë, rikujtojmë pushtetin se nëse ndodh precedent që Gjykata të fshijë një kryetar partie vetëm se person i paautorizuar ka bërë një kërkesë të tillë atëherë do inkurajojmë të gjithë të shkojnë në gjykata dhe të kërkojnë të shkruhen si kryetar të LSDM-së pasi që një praktikë e tillë po vendoset nga pushteti që udhëheq, LSDM”, ka deklaruar Demiri.
Në rast se vulat e partisë i takojnë shumicës absolute të Kryesisë Qendrore, kjo do jetë beteja e dytë e fituar nga Afrim Gashi kundër Bilall Kasamit. Para disa ditësh kur i gjithë opinioni kishte dilemën se pjesë e qeverisë si rezultat i rekonstruimit të saj do të jetë Bilall Kasami me dy deputetë, në fund kryeministri Zaev u përcaktua për Afrim Gashin i cili përfaqësohet me 3 deputetë në Kuvend. /tesheshi.com/
