Nga Blendi Gashi
Pas zhurmës dhe shtyrjes mes presidentëve Thaçi e Vuçiç, më në fund ka ndodhur dekretimi i 40 gjyqtarëve dhe 13 prokurorëve të rinj nga komuniteti jo-shumicë në një ceremoni të mbajtur në Presidencë ku ishin të pranishëm edhe ambasadori amerikan Delaëie dhe përfaqësuesja e BE-së në Kosovë, Apostolova.
Thaçi u ka thënë gjyqtarëve e prokurorëve serbë se mbi supet e tyre është një përgjegjësi e madhe që ata duhet ta mbajnë.
“Mirëpres gatishmërinë tuaj për t’u integruar në gjyqësorin e Kosovës dhe për të punuar në përputhje me legjislacionin e Kosovës. Po ashtu, mirëpres gatishmërinë e juaj se funksionin e gjyqtarit, respektivisht të prokurorit, do ta ushtroni me nder, përgjegjësi dhe paanshmëri, duke respektuar rregullat e etikës profesionale”, ka thënë Thaçi.
Opozita përplaset me ministrin e Drejtësisë për dekretimin e gjyqtarëve e prokurorëve serbë
Vetëm pak orë pas dekretimit të gjyqtarëve e prokurorëve serbë, opozita ka ngritur dyshimet rreh mënyrës së dekretimit të tyre duke thënë se kanë informacione se ky akt nuk është bërë në harmoni me Kushtetutën e vendit.
Albulena Haxhiu, anëtare e Komisionit për Legjislacionit nga Vetëvendosje, në një takim të këtij komisioni ka thënë të ketë marrë informacione se teksti i betimit të gjyqtarëve dhe prokurorëve serbë nuk është bërë siç bëhet me të gjithë të tjerët.
Ajo ka paraqitur një listë me emrat e tyre që thotë se i janë servuar delegacionit të Kosovës nga Serbia dhe të njëjtit kanë dhënë betimin sot.
Por këtë e ka mohuar kategorikisht ministri i Drejtësisë, Abelard Tahiri, i cili ishte i ftuar të raportoi në komision për çështjen në fjalë me ç’rast ka thënë se tashmë është shtrirë sovraniteti në tërë territorin e vendit.
“Nga sot, shtrirja e sovranitetit me terma praktikë po ndodhë në tërë territorin e Kosovë. Këto marrëveshje janë në përputhje të plotë me Kushtetutën e Kosovës. Gjyqtarët dhe prokurorët nga komuniteti shumicë janë dekretuar sipas ligjeve të Kosovës”, tha ministri Tahiri.
Pse dokumentet për betimin e gjyqtarëve e prokurorëve serbë nuk u jepen deputetëve?
Shqetësim për dekretimin e bërë sot në Presidencë ngriti edhe anëtari tjetër i komisionit, Arben Gashi nga LDK, i cili tha se është shqetësues fakti që dokumentet në lidhje me betimin e gjyqtarëve dhe prokurorëve serbë nuk u jepen deputetëve.
“Gjithçka që nuk protokolohet si sekret shtetëror, ne kemi të drejtë t’i kemi”, tha Gashi.
Ai ka pyetur po ashtu nëse në këtë përbërje ka edhe të etnive tjera, apo të gjithë janë serbë.
Ndërkaq, ministri Tahiri tha të mos jetë marrë me secilin prej tyre por tha se në bazë të mbiemrave ka parë që ka edhe boshnjakë, romë, ashkali e turq.
“Betimi i tyre është bërë siç është bërë me të gjithë të tjerët dhe nuk ka asnjë lloj dallimi. Nëse nesër dikush prej gjyqtarëve bie ndesh me sistemin e drejtësisë në Kosovë, ai do të largohet. Zyra e Prokurorit Disiplinor merret me ta”, tha Tahiri.
Ndërsa Sami Kurteshi nga Vetëvendosje tha se është mirë të shihen emrat dhe të bëhet krahasimi me listën që posedojnë deputetët nëse vërtet për ata emra ka vendosur Beogradi.
Tahiri tha se nëse dikush konsideron se marrëveshja është antikushtetuese mund t’i drejtohet Gjykatës Kushtetuese.
Dekretimin dhe betimin e të gjyqtarëve dhe prokurorëve serbë e ka mirëpritur Bashkimi Evropian ku nënjë deklarate të lëshuar në faqen zyrtare të BE-së nga zëdhënësja Maja Kocijançiq, thuhet se integrimi i tyre shënon zbatimin e marrëveshjes së drejtësisë të arritur në shkurt 2015 nën dialogun e lehtësuar nga BE-ja.
“Një përfaqësues i integruar gjyqësor i të gjitha komuniteteve në Kosovë është një element kritik për të siguruar drejtësinë në emër të të gjithë popullsisë. Një gjyqësor i integruar do të lejojë një zbatim uniform të ligjit të Kosovës në të gjitha Gjykatat Themelore të Kosovës dhe nga të gjitha prokuroritë e Kosovës“, thuhet në komunikatë.
Ndërsa Këshilli Gjyqësorë i Kosovës (KGJK) dekretimin e gjyqtarëve dhe prokurorëve të komunitetit jo shumicë, e ka quajtur hap të rëndësishëm për drejtësinë kosovare që sipas tyre shënon konsolidimin e një sistemi unitar të drejtësisë në tërë territorin e vendit. /tesheshi.com/
