Furia e zemërimit turk ndaj përpjekjes së autoriteteve gjermane për t’u mbyllur derën takimeve për fushatën e referendumit mbi ndryshimet kushtetuese në Turqi nuk ka të sosur.
Presidenti Erdogan është treguar dje i pakursyer në dy veprimtari në Stamboll, teksa e ka kritikuar ashpër qëndrimin gjerman.
Theksi i tij ka qenë te praktikat naziste, duke nënvizuar më së pari dje: “Gjermani! Nuk ke të bësh aspak me demokracinë. Praktikat tuaja të fundit nuk kanë ndryshim nga ato të nazistëve në të shkuarën.”
“Ata nuk i lënë shokët tanë të flasin një Gjermani. Le ta bëjnë këtë. A mendoni se ndalimi i një ministri turk nga mbajtja e një fjalimi [në Gjermani] ka për t’i bërë votat ‘Jo’ në vend të ‘Po’-së?”, ka qenë pyetja e Erdoganit, i njohur për gjuhën e tij të ashpër kur vjen puna për të mbrojtur interesat e Turqisë.
Akoma më i ashpër qe ai në një tjetër aktivitet, në orët e mbrëmjes të së dielës. Gjithnjë për të njëjtën temë, presidenti turk do të thoshte: “Kujtoja se nazizmi ka marrë fund në Gjermani. Por ai është aty akoma. Hapur! Nëse besoni në demokraci, ministri im do të takohet dhe me ministrin, e po ashtu atje do të bëjë një tubim. Pse shqetësohesh?”
Erdogani është shprehur më pas tejet sfidues në fjalën në të njëjtin aktivitet: “Vëllezër, tani kujtojnë se Tajjip Erdogani do të shkojë në Gjermani. Nëse dua, shkoj. Shkoj dhe e ngre botën në këmbë kur të mos më hapet dera a të mos lihem të flas.”
Ndërkohë, pas gjithë këtij rrëmeti, mësohet se ministri turk i Ekonomisë është lejuar që të takohet të dielën me komunitetin e bashkatdhetarëve në Këln, një takim i anuluar më herët. /tesheshi.com/
