Duke folur përbri ministrit të Jashtëm gjerman, Frank-Walter Steinmeier, homologu turk, Mevlüt Çavuşoğlu, ka shprehur zhgënjimin e vendit të tij për hipokrizinë dhe standardet e dyfishta të Bashkimit Europian ndaj Turqisë.
Në konferencën e shtypit në Ankara me kryediplomatin gjerman, Çavuşoğlu ka bërë të ditur se po shqyrtohej mundësia e një referendumi në Turqi për të ardhmen e marrëdhënieve me BE-në.
“Një ministër i Jashtëm i BE-së del çdo ditë dhe thotë, ‘Ta nxjerrim jashtë Turqinë, t’i largojmë ata nga negociatat, t’i nxjerrim nga NATO-ja.’ Nuk e meritojmë këtë trajtim. Prandaj, le të pyesim popullin tonë, e le të vendosë ai.”
Shefi i politikës së jashtme turke nuk e ka fshehur mërzitjen e thellë me qasjen ndaj Turqisë.
“Na ka ardhur në majë të hundës me këtë qasje që e poshtëron Turqinë,” ka theksuar ai.
Frank-Walter Steinmeier e ka pranuar se bisedimet me homologun turk nuk kishin qenë të lehta, duke nënvizuar po ashtu se i takon popullit turk të vendosë nëse do të ketë një vijim të bisedimeve për pranim në BE. /tesheshi.com/
