Incidentet e fundjavës që çuan në tensionimin e marrëdhënieve turko-holandeze, me anulimin e lejes së fluturimit të ministrit të Jashtëm turk dhe me nxjerrjen jashtë kufirit holandez të ministres turke të Familjes dhe Politikave Sociale, nuk kanë mbetur pa përgjigje në Turqi.
Nga një mbledhje e qeverisë turke e së hënës është dalë me një varg vendimesh, të cilat i ka bërë të njohura zëvendëskryeministri dhe zëdhënësi i qeverisë turke, Numan Kurtullmush.
Me të dalë në konferencë shtypi, ai do të pohonte se Turqia ka vendosur t’i ndërpresë të gjitha diskutimet politike në nivel të lartë me Holandën.
Një vendim tjetër në të njëjtën linjë ka qenë ai mbylljes së hapësirës ajrore të Turqisë për diplomatët holandezë. Hapësirë që do të mbetet e mbyllur për ta deri në plotësimin e kërkesave të Turqisë.
“Kemi vendosur të mos i lejojmë fluturimet diplomatike holandeze drejt Turqisë,” u tha gazetarëve zëvendëskryeministri turk.
Veç kësaj, ambasadorit holandez, Kees Cornelis van Rij, aktualisht me leje, nuk do t’i lejohet të kthehet në Ankara.
Numan Kurtullmush bëri të ditur gjithashtu se qeveria do t’i kërkojë parlamentit të tërhiqet nga grupi i miqësisë holandezo-turke.
Vendimet e fundit reflektojnë një tension të jashtëzakonshëm në marrëdhëniet midis dy vendeve, të provokuar nga sjellja e patolerueshme e autoriteteve holandeze.
Opozita politike në Turqi ka qenë akoma më e ashpër; kryetari i CHP-së, partisë kryesore opozitare, ka kërkuar pezulllim të të gjitha marrëdhënieve me Holandën. /tesheshi.com/
