Autoritetet turke janë shprehur prej ditës së djeshme për një zgjidhje përmes dialogut të përplasjes mes vendeve të Gjirit Persik, të finalizuar me një ndërprerje të marrëdhënieve diplomatike me Katarin.
Zëdhënësi i presidentit turk ka shprehur gatishmërinë e vendit të tij për të ndihmuar në zgjidhjen e krizës diplomatike.
Në një deklaratë të Ibrahim Kallënit thuhej se, “Vendet në rajon duhet t’i vlerësojnë marrëdhëniet e tyre në bazë të unitetit dhe solidaritetit, e jo në bazë të lajmeve e pretendimeve të pambështetura.”
Aspak e prirur për të parë një konflikt mes vendeve të Gjirit, Turqia kërkon dialog mes tyre në vend të përkeqësimit të përplasjes.
“Në një kohë kur rajoni është në kërkim të paqes dhe stabilitetit, anëtarët e Këshillit të Bashkëpunimit të Gjirit, me të cilët Turqia është në një aleancë strategjike biznesi, duhet të ndërmarrin hapat e nevojshëm drejt arritjes së këtyre objektivave të përbashkët përmes negociatës, dialogut dhe komunikimit,” është shprehur po ashtu Ibrahim Kallën.
Presidenti Erdogan gjithashtu ka patur një ditë të ngjeshur me telefonata në kërkim të zbutjes së tensioneve. Në bisedat e tij telefonike me emirin e Katarit, me atë të Kuvajtit, me mbretin saudit, si dhe me presidentin rus Vladimir Putin, ai ka bërë thirrje për një zgjidhje diplomatike.
Në një reagim të tij, ministri i Jashtëm turk, Mevlyt Çavushogllu, ka shprehur pikëllimin për vendimet respektive të një numri vendesh për ndërprerjen e marrëdhënieve diplomatike me Katarin.
“Turqia e sheh unitetin dhe solidaritetin midis shteteve të Gjirit si unitet të saj. Dialogu duhet të vazhdojë në çdo rrethanë, kështu që problemet ekzistuese të mund të zgjidhen në një mënyrë paqësore,” ka thënë Çavushogllu në një konferencë shtypi në Ankara me homologun e tij gjerman.
Në një editorial të sajin, e përditshmja Daily Sabah, ndërsa bën thirrje që Turqia të shërbejë si ndërmjetëse në zgjidhjen e krizës, e vë theksin në padobishmërinë e një përplasjeje të tillë duke patur parasysh situatën në të cilën gjendet bota islame.
“Në një kohë kur bota islame përballet me sfida serioze… përshkallëzimi i tanishëm mes vendeve muslimane nuk i shërben interesit të askujt, aq më pak interesit të më shumë se një miliard muslimanëve në mbarë botën,” thuhet në këtë editorial.
Një numër vendesh arabe, të udhëhequr nga Arabia Saudite dhe Egjipti, lajmëruan një ditë më parë ndërprerjen e marrëdhënieve diplomatike me Katarin, duke e akuzuar këtë vend për mbështetje të ekstremizmit e duke e argumentuar vendimin me ruajtjen e sigurisë kombëtare. /tesheshi.com/
