Duke rritur kapacitetin e depozitimit të gazit natyror në Silivri, afër Stambollit, Turqia ka depozitimin më të madh të gazit në Evropë që nga e premtja.
Në Silivri u zhvillua një program me rastin e përfundimit të projektit për rritjen e kapacitetit të depozitës nëntokësore të gazit, ku foli presidenti turk Rexhep Tajip Erdogan.
“Duke rritur kapacitetin, Silivri është bërë depozitimi më i madh nëntokësor i gazit në Evropë”, tha ai, transmeton Anadolia.
Ai theksoi se Turqia sot me shërbimet energjetike që ofron për qytetarët dhe industrinë e saj është vendi i 17-të në botë për nga sasia e furnizimit.
“Po hyjmë në një epokë të re, në të cilën do ta çojmë vendin tonë në krye duke korrur frytet e përpjekjeve që kemi investuar në 20 vitet e fundit”, tha Erdogan.
“Transformimi në një qendër globale”
“Qëllimi ynë është ta shndërrojmë vendin tonë sa më shpejt në një qendër globale ku do të përcaktohet çmimi i referencës së gazit natyror. Ne kemi vendosur një vizion energjetik për të reduktuar varësinë tonë të jashtme nga burimet parësore nga 71 përqind në 13 përqind deri në vitin 2053”, tha ai.
Pas rritjes së kapacitetit, objekti i magazinimit do të jetë në gjendje të plotësojë tetë për qind të nevojave vjetore të Turqisë për gaz natyror.
Nevojat e objektit për energji elektrike do të plotësohen nga një turbinë ere me fuqi të instaluar 4.2 megavat.
Kapaciteti i magazinimit u rrit nga 3.2 miliardë në 4.6 miliardë metra kub gaz.
Kapaciteti ditor i prodhimit të kthimit u rrit nga 28 milionë në 75 milionë metra kub gaz. /tesheshi.com/
