Ambasada turke në Kosovë i ka bërë thirrje qeverisë vendase që të marrë masa kundër një gazetari në lidhje me komentet e tij në Facebook, pas përpjekjes për grusht shteti.
Fjala është për Berat Buzhalën, i cili shkroi në Facebook atyre orëve:
“I ftoj qytetarët e Republikës së Kosovës të cilët janë në pushime në Turqi, t’i bashkangjiten ushtrisë turke. Ky është grusht-shteti më serioz që nga ardhja e Facebook-ut”, ka shkruar Buzhala.
Turqia është një prej mbështetësve kryesor të Kosovës, e cila shpalli pavarësinë nga Serbia me 2008, shkruan Reuters.
“Ministria duhet të sigurojë që do të ndërmerren hapa të nevojshme në lidhje me këtë person në përputhje me ligjin”, thuhet në notën e protestës, në të cilën është bashkangjitur edhe screen-shot i postimit të Buzhalës.
Në notën e ambasadës, citohet neni i ri i adaptuar në ligjin e Kosovës, i cili ndalon qytetarët e saj që t’i bashkohen konflikteve të armatosura jashtë vendit.
Në notën e vërejtjes, ambasada gjithashtu shkruan që për shkak të komenteve të tilla si ky pra i Buzhalës, ligji përcakton dënim prej gjashtë muaj deri pesë vite burgim. /tesheshi.com/
