Turqia, forcim lidhjesh me Saudinë, Katarin dhe Emiratet

Presidenti turk Rexhep Tajip Erdogan njoftoi një vizitë të ardhshme në vendet e Gjirit dhe tha se vendi i tij dëshiron të forcojë më tej lidhjet e tij me Arabinë Saudite, Katarin dhe Emiratet e Bashkuara Arabe.

“Kemi shpresë për këtë vizitë. I dërgova miqtë e mi paraprakisht. Ata vizituan Arabinë Saudite, Katarin dhe Emiratet e Bashkuara Arabe. Ne do të dëshironim të forconim më tej të gjitha llojet e marrëdhënieve mes nesh duke udhëtuar në Arabinë Saudite, Katar dhe Emiratet e Bashkuara Arabe”, u tha ai gazetarëve, duke u kthyer nga samiti dy-ditor i NATO-s në Lituani.

Erdogan pritet të vizitojë tre vendet nga 17 deri më 19 korrik, raporton Anadolia.

Përpara Erdoganit, zv/presidenti turk Cevdet Yilmaz dhe ministri i Thesarit dhe Financave Mehmet Shimsek vizituan Katarin për të diskutuar bashkëpunimin ekonomik.

“Gjatë vizitave paraprake, miqtë tanë dhanë informacione të caktuara. Gjatë vizitës sonë do të kemi mundësinë të shohim vetë mbështetjen që do t’i japin Turqisë”, tha Erdogan.

Kompanitë turke, depërtim në tregjet e Gjirit

Duke theksuar se si këto vende të Gjirit kanë shprehur gatishmërinë e tyre për investime të konsiderueshme në Turqi në takimet e mëparshme, Erdogan tha se vizita e ardhshme do të jetë një mundësi për të bërë hapa edhe në këtë drejtim.

Fitorja e Erdoganit në zgjedhjet presidenciale të Turqisë më 28 maj forcoi bashkëpunimin midis Ankarasë dhe Këshillit të Bashkëpunimit të Gjirit (GÇ).

Emiri i Katarit Sheikh Tamim bin Hamad Al Thani ishte lideri i parë që uroi Erdoganin, i cili mori detyrën për një mandat të tretë presidencial.

Udhëheqësit e tjerë të Gjirit ndoqën shpejt shembullin, duke shprehur dëshirën për të forcuar lidhjet me Turqinë.

Për vendet arabe të Gjirit, lidhjet më të thella me Turqinë janë të rëndësishme për planet e tyre të diversifikimit ekonomik.

Kompanitë turke, veçanërisht në sektorin e ndërtimit, kanë depërtuar në tregjet e Gjirit dhe kanë kontribuar në rritjen e megaprojekteve, nga aeroportet, autostradat, stadiumet e deri te ndërtesat e larta. /tesheshi.com/