Turqia dhe SHBA kanë pezulluar përkohësisht procedurat e dhënies së vizave për qytetarët e vendeve përkatëse në selitë diplomatike kryesore por edhe në konsullata.
Siç bën të ditur televizioni publik turk TRT, ka qenë e para ambasada e SHBA-së në Ankara që e ka marrë një vendim të tillë pas arrestimit të një punonjësi turk të kësaj ambasade.
Oktay Akaya është arrestuar me akuzën e pjesëmarrjes në grushtin e shtetit të vitit 2016, duke qenë njëherësh pjesëtar i organizatës FETO themeluar dhe drejtuar nga Fetyllah Gylen, e akuzuar si planifikuesja e grushtit të shtetit.
Siç bën të ditur Daily Sabah, ambasada amerikane deklaroi se vendimi për pezullimin e vizave është i përkohshëm dhe është marrë për të minimizuar numrin e njerëzve që paraqiten pranë ambasadës amerikane në Ankara.
Ndërkaq, pak orë pas këtij vendimi, edhe ambasada e Turqisë në Uashington bëri të ditur se ka ndërmarrë një veprim reciprok.
“Ngjarjet e fundit e detyruan Qeverinë e Turqisë të rishikojë edhe njëherë angazhimin e qeverisë së ShBA-ve për garantimin e sigurisë së objekteve dhe stafit të misioneve diplomatike turke. Gjatë procesit vlerësues, procedurat për lëshimin e vizave për qytetarët amerikanë në të gjitha misionet tona në SHBA janë ndërprerë duke filluar që nga ky moment, me qëllim reduktimin e numrit të vizitorëve në ambasadën tonë dhe konsullatat e përgjithshme në SHBA”, thuhet në komunikatën e lëshuar nga misioni diplomatik turk në Uashington. /tesheshi.com/
