Ankaraja dhe Parisi vendosën të krijojnë një partneritet mes tyre si kundërpërgjigje ndaj administratës Trump, e cila me disa sanksione e masa financiare, siç janë rritja e tarifave për çelikun dhe alumimin e ardhur nga Europa, e së fundi dhe nga Turqia, po tenton të godasë financat dhe ekonominë e kësaj të fundit.
Por kjo ka shkaktuar një reagim zinxhir në Europë, pasi stabiliteti i Turqisë, edhe ai ekonomik, shihet si stabiliteti i Europës, ekonomik gjithashtu. Dhe pas Berlinit, është Parisi që ka shkrirë akujt me Ankaranë duke dalë krah Turqisë në këtë betejë financiare me SHBA.
Kështu, ministri i financave dhe i Thesarit në qeverinë Erdogan, Berat Albajrak dhe ministri francez i financave Bruno Le Maire, ranë dakord të punojnë së bashku dhe të bashkëpunojnë kundër veprimeve të SHBA, siç raportojnë mediat turke.
Albayrak ka shprehur mirënjohjen e tij për deklaratat e bëra nga Presidenti francez Emanuel Macron dhe Ministri Le Maire, të cilat kanë mbështetur Turqinë.
Albayrak dhe Le Maire vendosën të takohen në Paris më 27 gusht. /tesheshi.com/
