Ndalesa e dytë e presidentit turk Rexhep Tajjip Erdogan në vizitën e tij në vendet e Gjirit Persik ka qenë Arabia Saudite, ku ai është pritur në një sërë takimesh nga krerët më të lartë të shtetit.
Pas bisedimeve mes mbretit Selman dhe presidentit Erdogan të martën, lidhjet mes Arabisë Saudite dhe Turqisë do të çohen në nivele më të larta ndërsa përkojnë interesat e tyre mbi çështjet kyç rajonale, lexohet sot në shtypin saudit.
Në raportimet mbi vizitën e presidentit turk në Arabinë Saudite theksohet se dy vendet kanë pikëpamje të njëjta mbi konfliktet rajonale.
Bisedimet kanë përfshirë bashkëpunimin dypalësh, terrorizmin, si dhe çështjet rajonale, Sirinë, Jemenin, Libinë dhe Iranin.
Pas kësaj vizite, presidenti Erdogan ka shprehur falënderimet për mikpritjen në një mesazh në arabisht në Twitter.
“Dua t’u shpreh falënderimet mbretit Selman dhe popullit vëlla saudit për pritjen e përzemërt…”
Pas vizitave në Bahrejn dhe në Arabinë Saudite, shtetari më i lartë turk po viziton Katarin. /tesheshi.com/
