Ekipet e kërkim-shpëtimit të Forcave të Sigurisë së Kosovës, të cilat po punojnë me kapacitet të plotë që nga mëngjesi në Hatay të Turqisë, në mbrëmje kanë arritur të nxjerrin nga rrënojat një fëmijë dy-vjeçar.
Siç kanë bërë të ditur Forcat e Sigurisë së Kosovës, pas nxjerrjes së fëmijës po bëhen përpjekje maksimale për të shpëtuar nënën e tij të ngujuar në rrënoja.
“Gjatë aksionit që po kryejnë, ekipet tona kanë hasur viktima në ndërtesat e shembura, por përparësi kanë ato vende ku janë zbuluar persona të gjallë dhe të gjitha ekipet e shpëtimit nga e gjithë bota kanë prioritet shpëtimin e sa më shumë jetëve”, thuhet në deklaratë.
Një kontingjent i Forcave të Sigurisë së Kosovës në Republikën e Turqisë ka operuar në provincën Hatay që nga orët e hershme të mëngjesit për të mbështetur autoritetet turke në kërkimin dhe shpëtimin e njerëzve nën rrënoja pas tërmetit shkatërrues të së hënës.
Ministri i Mbrojtjes së Kosovës, Armend Mehaj, theksoi se njësitë kosovare po operojnë në rajonin e Hatayas, që është rajoni më i prekur i Turqisë.
Në një tjetër shfaqje solidariteti, qeveria e Kosovës shfaqi flamurin turk në fasadën e saj.
/tesheshi.com/
