Speleologu amerikan i bllokuar 1000 metra thellë në një shpellë në Turqinë jugore ka regjistruar një mesazh në të cilin thotë se është mirë, por ka nevojë urgjente për “ndihmë serioze” për të dalë në sipërfaqe.
40-vjeçari Mark Dickie po eksploronte rrjetin e shpellave Morcha me një ekip ndërkombëtar kolegësh kur pësoi gjakderdhje të brendshme. “Mirëmëngjes, unë jam Mark Dickie”, dëgjohet duke thënë speleologu i zbehtë dhe i veshur me rroba të ngrohta në videon e publikuar nga presidenca turke.
“Siç e shihni, unë jam në këmbë, jam vigjilent, po flas, por ende nuk jam shëruar dhe do të më duhet ndihmë serioze për të ikur nga këtu”, vazhdon ai, duke falënderuar autoritetet turke, shpëtimtarët dhe “botwn speleologjike” që nxituan në anën e tij.
Më shumë se 150 shpëtimtarë të trajnuar dhe rreth 20 ekipe nga Turqia dhe jashtë saj shkuan për të ndihmuar Dicky-n, sipas Federatës Turke të Speleologjisë.
“Përgjigja e shpejtë e qeverisë turke për të më ofruar ndihmën mjekësore që më duhej, mendoj se më shpëtoi jetën,” shtoi ai, duke shpjeguar se ishte “shumë afër fundit”. Ekipet e shpëtimit arritën të dërgonin gjak në shpellë që ai të merrte një transfuzion.
Ky ishte “një mundësi e mrekullueshme për të treguar se sa mirë mund të punojnë njerëzit kur punojnë së bashku”, shtoi ai.
Pamjet nga operacioni i shpëtimit tregojnë shpëtuesit duke folur me Dicky-n dhe duke ngritur një kamp të improvizuar në dhomën e shpellës ku ai ndodhet. Grupe të tjera kanë kampe jashtë shpellës së tretë më të thellë të Turqisë.
Tulga Sener, kreu i ekipit mjekësor të misionit të shpëtimit, tha se gjendja e Dicky-t është stabile dhe shenjat e tij jetësore janë normale. Tre mjekë do ta shoqërojnë atë gjatë daljes nga shpella. Operacioni i shpëtimit është ndarë në shtatë divizione, secili i caktuar në një ekip – të gjithë nga vende të ndryshme – për shkak të kompleksitetit të tij, tha Recep Salci, kreu i agjencisë turke të menaxhimit të fatkeqësive AFAD. “Sigurisht, kjo nuk është një shpellë ku njeriu del për shëtitje. Një speleologu i duhen 12 orë për të zbritur në të dhe 16 orë për t’u rikthyer lart”, shpjegoi ai.
Operacioni mund të marrë disa ditë për të përfunduar dhe eksplozivët mund të përdoren për të zgjeruar disa pasazhe të ngushta, shtoi ai. /tesheshi.com/
