“Marrëdhëniet midis Arabisë Saudite dhe Turqisë kanë përjetuar një përmirësim të shpejtë cilësor dhe sasior dhe ato po shkojnë drejt një intensifikimi të madh në të ardhmen e afërt, sepse dy vendet sot qëndrojnë si shtylla kryesore për stabilitetin rajonal”, deklaroi kështu ambasadori turk në Riad, Yunus Demirer.
Duke folur me rastin e ditës kombëtare turke, ai tha se “thellësia dhe diversiteti i marrëdhënieve tona, angazhimi ynë i përbashkët për stabilitetin dhe mirëqenien e rajonit dhe interesat e ndërlidhura, i udhëheqin vendet tona për të nxitur marrëdhëniet ekzistuese në nivele më të larta. Ne jemi dy vende vëllazërore të lidhura me lidhje të forta historike, shoqërore dhe kulturore.”
Demirer tha se Arabia Saudite, vendlindja e Islamit dhe shtëpia e dy xhamive të shenjta, gjithmonë ka pasur një vend të nderuar në zemrat dhe mendjet e Turqisë. E tashmë theksoi ai, të dy vendet janë aleatë të ngushtë dhe partnerë të fuqishëm ekonomik. “Thellimi i mëtejshëm i marrëdhënieve tona në të gjitha fushat nuk do të ishte vetëm dobiprurës për popullin tonë, por edhe për të gjithë rajonin”, vijoi më tej përfaqsuesi diplomatik i Ankarasë në Saudi.
Duke iu përgjigjur një pyetjeje rreth qëndrimit të Turqisë mbi Sirinë, Jemenin dhe procesin e paqes në Lindjen e Mesme, i dërguari tha: “Arabia Saudite dhe Turqia kanë pikëpamje të përbashkëta dhe qasje ndaj një sërë çështjesh rajonale si gjendja e palestinezëve, konflikti sirian, situatën në Irak dhe luftën kundër terrorizmit .”
Ambasadori turk komentoi dhe zhvillimet e pritshme në Saudi, në kuadër të projektit “Vizion 2030”, që pritet të sjellë një erë të re në stilin e të mënduarit dhe të jetuarit të Arabisë Saudite.
“Gjatë gjithë kësaj rruge të vështirë të transformimit ekonomik dhe shoqëror, Arabia Saudite mund të jetë e sigurtë se do të gjejë një partner të besueshëm dhe një mik në Turqi”, tha ai.
Kjo frymë e re e promovuar së fundi për raportet mes dy vendeve, vjen pas një pozicionimi të Ankarasë kundër Saudisë lidhur me sanksionet ndaj Katarit, ndërkohë që dy vendet kanë dhe një rivalitet historik në lidhje me lidershipin në botën islame. Por kohët e fundit, Erdogan ka bërë thirrje për unitet mes tyre në të mirë të muslimanëve. /tesheshi.com/
