Një zjarr i rënë mbrëmjen e së martës në një konvikt vajzash në Aladağ të Adanasë, në jug të Turqisë, u ka marrë jetën 12 personave e ka plagosur 22 të tjerë.
Nga viktimat, 11 prej tyre janë nxënëse të moshës 10-16 vjeç. Asnjë prej të plagosurve nuk është në gjendje të rëndë.
Zjarri në konviktin ku qëndronin 34 nxënëse mësohet të ketë rënë rreth orës 19:30 të ditës së djeshme. Shkaku i rënies së zjarrit besohet të jetë një problem në rrjetin elektrik të ndërtesës.
Zjarri është vënë nën kontroll tre orë pasi ai ka përfshirë ndërtesën trekatëshe. Godina ka patur shkallë emergjence, por, siç raportojnë mediat turke, dalja për tek to ka qenë e kyçur. /tesheshi.com/
