Në vijim të një turi ku promovon triumfin politik më 30 Qershor, referuar pjesëmarrjes e jo rezultatit, që sipas tij shkon krah opozitës, kreu demokrat Basha ishte në Rrogozhinë. Prej aty, Basha shpalli atë që beson se do ndodhë së shpejti, rrëzimin e qeverisjes së Ramës.
“Pavlefshmëria e 30 qershorit ka marrë vulën që nuk e ka asnjë proces politik në 30 vite pluralizëm. 85% e shqiptarëve refuzuan farsën e 30 qershorit, refuzuan regjimin dhe u bënë pjesë e shumicës ‘Rama ik’. 30 qershori është nul. Uzurpimi i dhunshëm i pushtetit vendor është kriminal. Shumë shpejt do ta shporrim këtë pakicë kriminale nga Rrogozhina nga Kavaja, Durrësi, Elbasani dhe nga gjithë Shqipëria”, u shpreh Basha.
Ai i morri dhe njëherë në mbrojtje aktet e Metës me datat e zgjedhjeve, duke e quajtur kësisij 30 Qershorin e paligjshëm, e kjo përkundër ndërkombëtarëve që e njohën dhe e konsiderojnë të ligjshëm.
“30 Qershori ishte një farsë antikushtetuese që u zhvillua në dhunim flagrant të dekretit të Presidentit, kur me Kushtetutë, i vetmi që cakton datën e zgjedhjeve është Presidenti. Po me Kushtetutë, i vetmi institucion që mund të gjykojë mbi dekretet e Presidentit, është Gjykata Kushtetuese e cila nuk ekziston, sepse e shkatërroi me zell dhe me mburrje Edi Rama për t’i marrë ai pushtetet e Gjykatës Kushtetuese”, theksoi kreu demokrat. /tesheshi.com/
