Televizioni shtetëror sirian ka lajmëruar marrjen nga ushtria siriane të një bastioni të opozitës. El-Haderi, në jug të Halepit, u mor të enjten me mbështetjen e forcave aleate të regjimit dhe me ndihmën e sulmeve ajrore ruse.
Ky është përparimi i dytë i madh këtë javë në këtë provincë. Një burim ushtarak do t’i deklaronte agjencisë së lajmeve AFP se trupat siriane dhe forcat aleate kanë kontrollin e plotë të el-Haderit.
I njëjti burim do të bënte të ditur se në operacion po merrnin pjesë trupa të Hezbullahut dhe forca iraniane.
Marrja e el-Haderit vjen pas një suksesi tjetër të forcave qeveritare të martën, ndërsa ata mundën të hynë në bazën ushtarake të Kvejrisit, në lindje të Halepit, duke çarë rrethimin e ISIS-it.
Vetë qyteti i Halepit është i ndarë më dysh, me regjimin që kontrollon perëndimin e tij, e me forcat rebele që kanë nën kontroll pjesën lindore.
Forcat qeveritare të ushtrisë kanë nisur një mësymje të gjerë, të nxitur e të ndihmuar nga sulmet ajrore ruse, që filluan më 30 shtator. Ofensiva ka qenë e suksesshme në një pjesë të territorit sirian. /tesheshi.com/
