Sulmet terroriste në Barcelonë, kanë çuar presidentin Trump drejt një tjetër deklarate kontraverse.
Fillimisht ai ka dënuar sulmin terrorist përmes një postimi në Twitter:
“Jini të fortë dhe jini të fuqishëm, ju duam”, ishte porosia e tij drejtuar qytetarëve të Barcelonës.
Por më pas, Trump publikoi një tjetër postim po ashtu në Twitter, duke u futur në çështje më delikate dhe prekur sentimente komunitare: “Studioni se çfarë u bënte gjenerali amerikan Pershing terroristëve kur i zinte. Nuk pati më terror radikal islamik për 35 vite!”, shkroi ai.
Trump, edhe gjatë fushatës pati sjellë në kujtesë historinë rreth gjeneralit Pershing.
Po cila është ajo histori?
Gjenerali i cili udhëhoqi me trupat amerikane në Evropë gjatë Luftës së Parë Botërore, u bë i njohur në fillim të shekullit të 20-të, kur në Filipine kishte kapur 50 terroristë të cilët kishin bërë dëme të jashtëzakonshme dhe kishin vrarë shumë njerëz. Miti thotë se gjenerali i kishte varrosur ata me derra dhe pushkët e ushtarëve të tij ishin mbushur me plumba të ngjyer në gjak derri. Ushtarët kishin qëlluar 49 terroristët, kurse njërit prej tyre që kishte mbijetuar, gjenerali i kishte thënë: “Shko te njerëzit tuaj dhe tregoju atyre se çfarë ka ndodhur këtu”.
Por deri më sot, nuk ka asnjë dëshmi të ftohtë historike se kjo në fakt ka ndodhur ndonjëherë, dhe nuk ka asnjë historian të vetëm që mbështet këtë histori në terma profesionalë.
Trump ka përdorur këtë histori edhe në fushatën elektorale, si një shembull se si duhet trajtuar ata që ai i quan “terroristë radikalë islamië”. The Washington Post vuri në dukje se Presidenti tregoi këtë histori kur ai mbrojti idenë e kthimit të torturës me ujë.
Në këtë rast, Trump nuk i kishte përmendur muslimanët, por kishte thënë: “E tëra ka të bëjë me derrat, ju e dini historinë, ju e dini që atyre nuk u pëlqen mishi i derrit”.
Në fakt, muslimanët jo thjesht nuk u pëlqen mishi i derrit, por që e kanë ndaluar që ta konsumojnë atë, referuar një urdhërese kuranore. /tesheshi.com/
