“Ditë e madhe e planifikuar nesër për sigurinë kombëtare. Midis shumë gjërave të tjera, ne do ta ndërtojmë murin,” është shënimi më i fundit në Twitter i presidentit të 45-të të SHBA-së, të sapoulur në zyrën ovale.
Donald Trump ka premtuar një të mërkurë të ethshme, dhe siç raporton The Guardian duke iu referuar burimeve nga administrata e tij, ai do të nënshkruajë një numër urdhrash ekzekutivë në lidhje me kufizimin e emigracionit, si dhe me sigurinë kufitare.
Përndryshe, Trump duket se do t’i shkojë gjer në fund premtimit elektoral për të ndërtuar një mur përgjatë kufirit me Meksikën, ndërsa disi e koklavitur mbetet çështja se kush do të paguajë për të.
Presidenti i sotëm pati deklaruar se Meksika do të paguante për murin, një ide e hedhur poshtë nga ana tjetër e kufirit. Më herët gjatë këtij muaji, Trump bëri të ditur se projekti i ndërtimit do të financohej fillimisht nga taksapaguesit, e Meksika do ta rimbursonte më pas SHBA-në. Më shumë dritë mbi çështjen do të hidhet javën tjetër, kur presidenti meksikan, Enrique Pena Nieto, të vizitojë Shtëpinë e Bardhë.
Trump pritet të nënshkruajë urdhra që përfshijnë kufizimin e hyrjes në vendin e tij të refugjatëve dhe të një pjese të të pajisurve me vizë nga Iraku, Irani, Libia, Somalia, Sudani, Siria dhe Jemeni.
Kufizimet për refugjatët mund të përfshijnë një ndalim disamuajsh të pranimit nga të tëra vendet, gjer në bërjen më të rreptë të procesit të verifikimit. /tesheshi.com/
