Pas telasheve me librin që ka tronditur Uashingtonin, Donald Trump po rreket të dalë nga rrethimi dhe të rrethojë jo vetëm metaforikisht Shtetet e Bashkuara të Amerikës.
Siç bën të ditur La Stampa, presidenti amerikan ka kërkuar 18 miliard dollarë nga Kongresi, që të financohet muri që do të ndërtohet në kufirin me Meksikën.
Bëhet fjalë për 500 kilometra mur, ose për të qenë më të qartë sa është largësia me rrugë nga Tirana në Sofje të Bullgarisë.
Trump ka përgatitur lëvizjen e tij së bashku edhe me një ofertë për demokratët në Kongres: mund të anulojë dekretin për dëbimin e 800 mijë adoleshentëve që kanë mbërritur në SHBA pa prindër kur ishin fëmijë.
Siç bën të ditur Agjencia e Kufijve dhe Doganave të SHBA-së, do të ndërtohen edhe 502 kilometra mur, që e çon gjithsej sipërfaqen e rrethuar me Meksikën në 1552 kilometra deri në 2027-n.
Ndërkaq, 651 kilometra që tashmë janë ndërtuar nga administrata e kaluara do të forcohen dhe ngrihen më lart. Kostoja e të gjithë punimeve shkon në 18 miliardë dollar, pra 1.8 miliardë në vit.
Administrata Trump kishte kërkuar ndërkohë 1.6 miliardë USD për të ndërtuar një mur në Teksas dhe Kaliforni.
Tani fillon negociata e Shtëpisë së Bardhë me Kongresin për të autorizuar miratimin e fondeve.
Trump mendon se një kompromis me demokratët do të çojë në pranimin e tyre për paratë e murit. Presidenti i SHBA-së i ka dhënë kohë deri në mars për të përfunduar tratativën, në mënyrë që ndërtimi i murit të nisë kur të startojë fushata elektorale për gjysmën e Kongresit amerikan.
Zgjedhjet e mid-term-it siç quhen ato që zhvillohen dy vjet pas Presidencialeve, përbëjnë në SHBA një test të rëndësishëm politik për Shtëpinë e Bardhë.
Trump, që pas fitores në Presidenciale, ka pasur vetëm humbje në çdo test elektoral, përfshirë edhe bastione republikane siç ishte zgjedhja për një senator në shtetin e Alabamas.
Ndërkohë përpara Alabamas, republikanët humbën në zgjedhjet për Guvernatorin e Shtetit të New Jersey-t dhe supertestin e bashkisë së New York-ut, ku fituan dy kandidatë demokratë të krahut të majtë.
Ndërtimi i murit megjithatë nuk shikohet si një zgjidhje e problemit të emigracionit klandestin, por thjesht si manovër propagandistike.
Edhe administratat e kaluara, që nga Bill Clinton ndërtuan mur, por trafiqet e qënieve njerëzore lulëzojnë çdo moment pa u ndalur. /tesheshi.com/
