Nuk ka humbur kohë kandidati republikan në zgjedhjet presidenciale në Shtetet e Bashkuara për t’iu përgjigjur flakë për flakë kritikave të hidhura të presidentit aktual.
Ndërsa Obama do ta quante Donald Trump-in të papërshtatshëm për detyrën e presidentit, ky i fundit e ka cilësuar një “katastrofë” periudhën e qeverisjes së kreut të tanishëm të SHBA-ve.
Obama ka qenë “mbase presidenti më i keq në historinë e vendit tonë”, ka thënë Trump në një intervistë të para disa orëve në Fox News.
Nuk është ndalur me kaq Trump, duke shtuar, “Ai ka qenë i dobët, ka qenë i paefektshëm.”
E sa për kritikat e Obama-s për Trump-in në lidhje me paditurinë në politikën e jashtme, e me qasjen ndaj Rusisë dhe aneksimit të Krimesë, kandidati polemizues i republikanëve ka gjetur këto fjalë për t’u kundërpërgjigjur, “Besoj se di shumë më tepër mbi politikën e jashtme se ç’di ai (Obama). Shihni Ukrainën. Ai flet mbi Ukrainën dhe sa i ashpër është me Rusinë. Ndërkohë ata morën Krimenë.”
Trump ka shtuar dhe një tjetër kritikë për Obama-n e për Hillary Clinton-in gjatë kohës që ajo ishte sekretare e Shtetit, duke i akuzur që të dy për destabilizim të Lindjes së Mesme. /tesheshi.com/
