Trump me ethe elektorale: akuzon rivalen demokrate si përdoruese droge

Kandidati republikan për presidencën e Shteteve të Bashkuara të Amerikës, Donald Trump përshkallëzoi akuzat ndaj rivales së tij demokrate Hillary Clinton në përpjekje për të hequr vëmendjen nga skandalet e tij të njëpasnjëshme e që e kanë dëmtuar rëndë fushatën.  Këtë herë ai i bëri thirrje Clinton-it që përpara se të zhvillojnë debatin e fundit, të bëjnë testin e drogës.

Gjatë një tubimi  në New Hampshire, Trump theksoi se në debatin e dytë që zhvilluan dy kandidatët, Clinton dukej si e dehur, madje në përfundim të debatit, sipas Trumpit ajo nuk ishte të gjendje të shkonte as në makinë. “Duhet të bëjmë patjetër testin e drogës”, tha republikani, pa dhënë prova për akuzat e tij.

Në akuzat e tij, manjati njujorkez e cilësoi garrën zgjedhore të manipuluar. Këto komente vijnë pas publikimit të disa regjistrimeve të tij ku dëgjohet që flet në mënyrë të papëlqyeshme për gratë.

Sondazhet e fundit tregojnë që Trump është në dizavantazh me Clinton-in, pasi ka ngjallur shumë pakënaqësi me komentet e tij, si dhe po humb shumë mbështetje edhe mes republikanëve. /tesheshi.com/