Donald Trump i ka bërë të gjithë kundër, dhe tani po nis të paguajë çmimin e deklaratave të tij të pamenduara. Kundërshtari i tij në garën presidenciale mes republikanëve, Ted Cruz, ka fituar lehtësisht në Uiskonsin.
Fitorja e senatorit të Teksasit e ka bërë tanimë më të ndezur garën për t’i siguruar 1.237 delegatët që mundësojnë përzgjedhjen si kandidat presidencial te republikanët.
Pikë kthese e ka quajtur Ted Cruz këtë fitore, duke shfaqur vetëbesimin se do t’ia dalë të nominohet: “Jam gjithnjë e më tepër i bindur se fushata jonë po shkon drejt fitores së 1.237 delegatëve që duhen për të siguruar nominimin republikan.”
Trump ka deri tani 743 delegatë në krah të tij, krahasuar me 507 të tillë që ka Cruz-i.
Donald Trump nuk u paraqit në konferencën e zakonshme për shtyp, por një deklaratë pasuese e organizuesve të fushatës së tij përmbante fjalë mjaft të ashpra ndaj kundërshtarit. “Ted Cruz është më keq se një kukull. Ai është një kalë Troje…”
Te demokratët, Bernie Sanders, senatori i Vermontit, arriti fitoren e gjashtë në shtatë votimet e fundit paraprake.
Ai duket ta ketë ngushtuar diferencën me ish-sekretaren amerikane të Shtetit, por ende ka shumë punë përpara.
Më pranë numrit të 2.383 delegatëve që duhen për fitimin e nominimit partiak është për momentin Hillary Clinton, që ka garantuar 1.742 delegatë në mbështetje të saj, por 483 superdelegatët mund të ndryshojnë teorikisht kahje.
Sanders ka përkrahjen e 1.051 delegatëve, 31 prej të cilëve janë superdelegatë.
E vetmja kandidate femër në zgjedhjet paraprake në të dy kampet, Hillary Clinton e uroi kundërshtarin për fitoren me pak fjalë në faqen e saj të një rrjeti social. /tesheshi.com/
