Donald Trump ka reaguar menjëherë ndaj vendimit të Vladimir Putin-it për të mos i dëbuar diplomatët amerikanë si shpagim për atë çka u bë me 35 diplomatë rusë, të shpallur të padëshirueshëm në SHBA.
“Lëvizje e madhe! E kam ditur gjithmonë se ai ishte shumë i zgjuar,” shkroi presidenti i ardhshëm i SHBA-së në Twitter.
Rusia është akuzuar për ndërhyrje kibernetike në fushatën presidenciale amerikane, me ç’rast administrata e Obama-s u kërkoi 35 diplomatëve rusë ta lënë SHBA-në brenda 72 orëve, përpos disa vendimeve të tjera në të njëjtin kuadër.
Ministria e Jashtme e Rusisë sugjeroi të njëjtin veprim në shenjë hakmarrjeje, por Putin-i deklaroi se vendi i tij nuk do të ulej në nivelin e diplomacisë së papërgjegjshme, duke mos e miratuar dëbimin e diplomatëve amerikanë.
Madje, sipas BBC-së, përmes faqes elektronike të Kremlinit, Putin u uroi një Vit të Ri të lumtur Obama-s dhe familjes së tij, e gjithashtu dhe Trump-it e tërë popullit amerikan.
Zëdhënësi i Kremlinit, Dmitry Peskov, po ashtu, kishte lënë të kuptohej më herët se kundërpërgjigjja mund të shtyhej, për të parë më parë qëndrimin e administratës së re amerikane. /tesheshi.com/
