Lulzim Basha ka hartuar një plan për të thirrur javën e ardhshme një grup të larguarish nga Partia Demokratie, duke nisur që nga Gjergj Bojaxhiu, Neritan Sejamini dhe Bamir Topi.
Burime brenda PD-së bëjnë të ditur se lideri i opozitës do ta elaborojë më tej temën e “hapjes” që do të jetë me dy faza: i pari me zgjerimin e partive të koalicionit dhe e dyta rikrijimi i një “KOP”-i numër 2 me pjesëtar të shoqërisë civile, ku ish-këshilltari i Berishës, Neritan Sejamini dhe profesorë të tjerë si Mark Marku dhe Agron Gjekmarkaj do të përbëjnë skalionin “e mendjes”.
Të gjitha këto faza kanë qenë të planifikuara që më parë, por kreu i PD-së ka pritur se ç’do të bëjë Ilir Meta atje ku është; a do të largohet nga Edi Rama apo jo? Por kreu i LSI-së e ka shtyrë vendimin e tij dhe gjasat janë që të kemi një vendim final afër prillit, ndërkohë që Rama nuk rresht së përsërituri që prej dy javësh se do të qeverisë me Metën, duke e bërë fakt të kryer por pa marrë konfirmimin nga pala tjetër.
Mësohet se Basha nuk do të presë më dhe këto ditë do të shpallë “opozitën e re”, ku është projektuar që mbi një e treta e “senatorëve” nuk do të jenë në listat e deputetëve të PD-së më 18 qershor dhe ata do të zëvendësohen nga të rinjtë që do t’i nënshtrohen një votimi alla primarie në SHBA.
Të 12 qarqet e vendit nuk do të kenë në krye të listave deputetët e vjetër që janë caktuar si të deleguar prej gjashtë muajsh, por do të zëvendësohen nga një dymbëdhjetëshe frigno e përgatitur në fshehtësi të plotë nga Lulzim Basha dhe që pritet ta bëjë publike në një takim që do të zhvillojë së shpejti.
Një burim i tha tesheshi.com se një pjesë e kandidatëve për deputetë të PD-së janë figura të njohura publike që shfaqen në emisionet televizive por edhe në komunikimin online.
Ja një shembull: për qarkun Vlorë, Lulzim Basha ka bërë gati që të kandidojë si drejtues i listës Erion Kriston, pedagogun që është shumë popullor në rrjetet sociale por edhe në një emission debati që drejton prej vitesh.
Po ashtu edhe në qarkun Shkodër do të ketë një figurë të njohur publike në krye të listës, i cili nuk ka dalë nga prapaskenat politike të degëve.
Madje në degët e PD-së nëpër Shqipëri ka probleme të mëdha dhe thuajse të gjitha bashkitë kryesore janë me kryetarë të komanduar. Kështu, Dibra që prej largimit të Rrahim Kalecit nuk ka kryetar; ndërsa në Durrës u largua Osman Stafa e u komandua Bylykbashi, i cili s’mund ta bëjë kreun e degës pasi është njeriu kryesor i lidhjeve të PD-së me ndërkombëtarët për reformën në drejtësi dhe dekriminalizimin.
Por supriza e Lulzim Bashës do të jetë Kavaja. Siç bëhet me dije atje do të dërgohet si kandidat për kryetar bashie një figurë e rëndësishme politike e PD-së me origjinë nga ajo zonë, por që ka ruajtur të paprekur figurën e tij publike. Të jetë vallë Astrit Patozi?
Duhet pritur edhe pak, por jo shumë…
/tesheshi.com/
