Ballkani nuk ka akoma një dritë jeshile për të hyrë në BE, por Brukseli ka deklaruar sot synimin për të mbështetur zhvillimin ekonomik të rajonit.
Të mbledhur në Trieste, Itali, udhëheqësit e Ballkanit Perëndimor dhe të Bashkimit Europian, kanë diskutuar për mënyrat e integrimit të rajonit në BE.
Komisioneri për Politikat e Zgjerimit, Johannes Hahn tha se “Brukseli dëshiron që shtetet e Ballkanit Perëndimor të bëhen anëtare të BE-së dhe njëra nga arsyet kryesore për këtë është që të rinjtë të mos detyrohen t’i braktisin vendet e tyre.”
Sipas Hahn kjo do të ulte gjithashtu tensionet e së kaluarës, e theksoi se është detyrë e politikës të sigurojë bashkëpunimin, ndërsa përgjegjësinë për lidhjet ekonomike ia ngarkon komunitetit të biznesit. Sipas Hahn, ky projekt do të krijojë vlera si dhe do të lejojë kalimin e lirshëm të mallrave dhe shërbimeve.
Komisioneri i BE-së beson se themelimi i një zone të tillë ekonomike si një përgatitje e shkëlqyer për t’u bërë më pas pjesë e tregut të përbashkët europian.
Gjatë forumit të biznesit, palët firmosën gjithashtu një deklaratë të përbashkët e cila konfirmon vullnetin e palëve për të vijuar punën në këtë drejtim.
Në Trieste marrin pjesë kryeministrat e Kosovës, Shqipërisë, Malit të Zi, Serbisë, Maqedonisë dhe Bosnjë-Hercegovinës.
Gjatë samitit, Kancelarja Gjermane Angela Merkel pritet të paraqesë planin “Berlin Plus”, qëllim i të cilit është krijimi i një hapësire të përbashkët ekonomike, në mënyrë që integrimi ekonomik i rajonit të mbështesë edhe reformat sociale, politike e të tjera.
Ky është i katërti takim i këtij lloji, i organizuar në kuadër të “Procesit të Berlinit”, të nisur nga Angela Merkel në vitin 2014. Pas Berlinit, samite të ngjashme u mbajtën në 2015-n në Vjenë dhe vitin e kaluar në Paris./tesheshi.com/
