Evropa pothuajse ka dyfishuar importet e saj të armëve që nga viti 2019, me më shumë se gjysmën e dërgesave që vijnë nga SHBA, tha të hënën Instituti Ndërkombëtar i Kërkimeve të Paqes në Stokholm (SIPRI).
Në periudhën 2019-2023, vendet evropiane importuan 94 për qind më shumë armë sesa në pesë vitet e mëparshme, zbuloi instituti.
Të dhënat tregojnë sasinë e dërgesave, jo vlerën e tyre. Meqenëse shuma mund të ndryshojë ndjeshëm nga viti në vit, instituti publikon raporte për një periudhë pesëvjeçare.
Importuesi më i madh në Evropë ishte Ukraina me një peshë prej 23 për qind dhe vendin e katërt në listën botërore në periudhën 2019-2023. Që nga fillimi i pushtimit rus në fund të shkurtit 2022, ajo ka marrë ndihmë ushtarake në formën e armëve nga të paktën 30 vende, sipas SIPRI.
India ishte importuesi më i madh i armëve në botë në periudhën pesëvjeçare deri në fund të vitit 2023, e ndjekur nga Arabia Saudite dhe Katari.
Evropa bleu pak më shumë se gjysmën e armëve të saj nga SHBA, dukshëm më shumë se në periudhën 2014-2018, kur pjesa e SHBA-së në importet evropiane ishte 35 për qind.
“Vendimet e anëtarëve evropianë të NATO-s për importet nga SHBA janë të formuara nga faktorë të shumtë, duke përfshirë qëllimin e ruajtjes së marrëdhënieve transatlantike, krahas çështjeve të një natyre më teknike, ushtarake dhe kostoe”, shpjegoi drejtori i SIPRI-t, Dan Smith.
“Nëse marrëdhëniet transatlantike ndryshojnë në vitet e ardhshme, politika e shteteve evropiane për blerjen e armëve mund të ndryshojë gjithashtu”, shton Smith.
Eksportet e armëve amerikane u rritën me 17 për qind nga viti 2019 në 2023, me një pjesë prej 42 për qind të eksporteve botërore. Në pesëvjeçarin e mëparshëm ishte 34 për qind.
Në vendin e dytë në listën e eksportuesve botërorë është Franca, eksportet e së cilës janë rritur me 47 për qind. Kështu, pesha franceze në eksporte u hodh në 11 për qind dhe u barazua me atë të Rusisë, eksportet e së cilës u përgjysmuan në krahasim me periudhën 2014-2018.
Në vendin e katërt në listën botërore është Kina me pjesëmarrje në eksporte prej 5.8 për qind, dhe në vendin e pestë është Gjermania me 5.6 për qind. Eksportet gjermane u ulën me 14 për qind krahasuar me pesëvjeçarin e mëparshëm.
Italia renditet e gjashta në listën botërore të eksportuesve, Britania e shtata, Spanja e teta, Izraeli i nënti dhe Koreja e Jugut e dhjeta, sipas të dhënave të SIPRI-t. /tesheshi.com/
