Vitin e kaluar ka pasur më pak se 20 milionë katolikë në Gjermani. Ata përbëjnë 23.7 për qind të popullsisë së përgjithshme, që është më e ulëta deri tani, sipas të dhënave paraprake nga Konferenca e Ipeshkvijve Gjermanë, raporton DPA.
Numri i anëtarëve të regjistruar të kishës në vitin 2024 ishte 19,769,237, tha konferenca.
Në këtë vit, 321,611 njerëz u larguan nga Kisha, që është më pak se në vitin 2023 kur 402,694 katolikë u larguan nga Kisha.
“Kisha nuk duhet të mbyllë sytë ndaj këtyre treguesve”, tha Georg Bätzing, president i Konferencës së Peshkopëve Gjermanë.
“Ata na inkurajojnë të bëjmë përsëri pyetjen: për kë jemi ne si kishë?”, shkroi ai në faqen e internetit të dioqezës së tij Limburg.
“Kjo është arsyeja pse na duhen rrugë të reja, hapa të guximshëm dhe mbi të gjitha një vullnet i fortë për t’u fokusuar te realiteti”, shtoi peshkopi.
Sipas tij, njerëzit ende kanë pritshmëri të mëdha nga kisha – veçanërisht në arsim, edukim dhe përgjegjësi sociale.
Këto pritshmëri, shtoi ai, duhet të jenë parimi drejtues i veprimit, pavarësisht burimeve gjithnjë e më të pakta.
“Ne duhet të identifikojmë fushat kryesore për të ardhmen që janë afër realiteteve të jetesës së njerëzve – veçanërisht të rinjve dhe familjeve të tyre”, përfundoi Bätzing. /tesheshi.com/
